وزیر اعظم شہباز شریف نے 27 ویں آئینی ترمیم کی منظوری کے معاملے پر آج کابینہ کا اجلاس طلب کر لیا۔ ذرائع کے مطابق، وزیراعظم باکو سے بذریعہ ویڈیو لنک وفاقی کابینہ کے اجلاس کی صدارت کریں گے۔ ذرائع نے بتایا کہ حکومت نے پیپلز پارٹی کی آئینی ترامیم سے متعلق تجاویز قبول کر لی ہیں، اور وفاقی کابینہ اجلاس میں 27 ویں آئینی ترمیم کے مسودے کی منظوری دی جائے گی۔
دوسری جانب، اپوزیشن جماعتوں نے 27 ویں ترمیم کے مسودے کو مسترد کر دیا ہے۔
سینیٹ میں اپوزیشن جماعتوں نے اپنے اجلاس کے بعد جاری مشترکہ اعلامیے میں کہا کہ حکمران مسلم لیگ (ن)، پیپلز پارٹی اور اتحادی جماعتیں قانون سازی کو بلڈوز کر رہی ہیں اور آئینی ترمیم کا مسودہ اپوزیشن سے چھپایا جا رہا ہے۔
اس سے قبل پاکستان پیپلز پارٹی کی سینٹرل ایگزیکٹو کمیٹی (سی ای سی) کے اجلاس کے بعد میڈیا بریفنگ دیتے ہوئے بلاول بھٹو نے کہا کہ آئینی ترمیم کے تین نکات پر سی ای سی اجلاس میں اتفاق ہوا ہے۔
بلاول بھٹو نے مزید کہا کہ آرٹیکل 243 میں ترمیم کے حوالے سے پیپلز پارٹی حمایت کرے گی، آئینی عدالتیں قائم ہونی چاہئیں، اور میثاق جمہوریت کے دیگر معاملات پر بھی غور کیا جانا چاہیے۔
بلاول بھٹو نے کہا کہ این ایف سی کے تحت صوبوں کے فنڈز بڑھ سکتے ہیں کم نہیں ہوسکتے ، میثاق جمہوریت کے نامکمل ایجنڈا پر بات ہونی چاہیے، دیکھیں گےکہ 27ویں ترمیم کے پراسس میں دیگر شقوں پر اتفاق رائے لائیں۔
