بھارت کے معروف اداکار دھرمیندر نے پاکستان کے ایک اداکار اور ہوسٹ کے لیے نیک تمناؤں پر مشتمل محبت بھرا ویڈیو پیغام جاری کیا ہے جو دیکھتے ہی دیکھتے سوشل میڈیا پر وائرل ہوگیا۔
فلم شعلے کے ’’ویرو‘‘ لیجنڈری اداکار دھرمیندر نے پاکستانی اداکار اور میزبان احسن خان کے نام ایک ویڈیو پیغام بھیجا ہے جس میں بھارتی اسٹار نے احسن خان اور ان کے اہل خانہ کے لیے نیک تمناؤں کا اظہار کیا ہے۔
1960 میں فلمی کیریئر کا آغاز کرنے سے آج تک اپنی اداکاری کے جوہر دکھانے والے دھرمیندر نے ویڈیو پیغام میں کہا کہ آپ سب میرے اپنے ہیں۔ کبھی غیر نہیں سمجھا، آرٹسٹ تو ہوتے ہی جذباتی ہیں۔
View this post on Instagram
بھارت کے تقریباً تمام ہی صدارتی ایوارڈ حاصل کرنے والے دھرمیندر دیول نے احسن خان کومخاطب کرتے ہوئے کہا کہ میں دعا کرتا ہوں کہ تمھاری مقبولیت اور بڑھے۔ میری طرف سے آپ کے اور آپ کے اہل خانہ کے لیے بہت پیار اور ڈھیروں دعائیں۔
اداکار احسن خان نے دھرمیندر کے اس پیغام کو اپنے انسٹاگرام اکاؤنٹ پر شیئر کیا۔ احسن خان نے ویڈیو کے کیپشن میں لکھا کہ دھرمیندر جی آپ بہت شفیق ہیں، ان محبتوں کا شکریہ۔ فلم شعلے میں آپ نے ویرو کا کردار نبھایا تھا جو ہمیشہ سے میرے پسندیدہ کردار ہے۔
