امریکی ریاست واشنگٹن میں وائٹ ہاؤس کے قریب فائرنگ کے ایک سنگین واقعے میں نیشنل گارڈ کے دو اہلکار شدید زخمی ہوگئے۔ امریکی میڈیا کے مطابق ایک شخص نے اچانک اہلکاروں پر گولیاں برسا دیں، جس کے نتیجے میں دونوں موقع پر ہی گر پڑے اور انہیں تشویشناک حالت میں اسپتال منتقل کردیا گیا۔
واقعے کی اطلاع ملتے ہی پولیس کی بھاری نفری جائے وقوعہ پر پہنچ گئی اور علاقے کو مکمل طور پر گھیرے میں لے لیا۔ فائرنگ کے باعث وائٹ ہاؤس کو بھی کچھ وقت کے لیے عارضی طور پر بند کردیا گیا جبکہ شہریوں کو آئی اسٹریٹ کے آس پاس جانے سے گریز کرنے کی ہدایات جاری کی گئیں۔
پولیس نے کارروائی کرتے ہوئے مبینہ حملہ آور کو گرفتار کرلیا، جس کی شناخت 29 سالہ افغان شہری رحمان اللہ لکنوال کے طور پر کی گئی، جو 2021 میں امریکا آیا تھا۔
امریکہ کی ہوم لینڈ سکیورٹی کی سیکرٹری نے کہا کہ متعلقہ ادارے واقعے کی مکمل معلومات اکٹھی کر رہے ہیں اور تفتیش جاری ہے۔
دوسری جانب امریکی صدر ڈونلڈ ٹرمپ نے اس واقعے کو دہشت گردی قرار دیتے ہوئے اعلان کیا کہ بائیڈن دور میں ملک میں داخل ہونے والے تمام غیر ملکیوں کی دوبارہ جانچ پڑتال کی جائے گی۔
انہوں نے سوشل میڈیا پیغام میں حملہ آور کو "جانور" قرار دیتے ہوئے کہا کہ نیشنل گارڈ پر حملہ کرنے والوں کو سخت انجام کا سامنا کرنا پڑے گا۔
دونوں اہلکاروں کا تعلق ریاست ویسٹ ورجینیا سے تھا، ویسٹ ورجینیا کےگورنر نےکہا کہ وہ وفاقی حکام کے ساتھ مسلسل رابطے میں ہیں اور تحقیقات کی جاری ہیں۔
دوسری جانب فائرنگ کے واقعے کے بعد واشنگٹن کے رونالڈ ریگن ائیرپورٹ پر پر وازوں کو سکیورٹی کی وجہ سے گراؤنڈ کیا گیا تاہم کچھ دیر کی بندش کے بعد ائیرپورٹ پر معمول کی کارروائیاں دوبارہ شروع کردی گئیں۔
