ویتنام کے مختلف حصوں میں طوفانی بارشوں اور شدید سیلاب کے باعث ہلاکتوں کی تعداد 90 تک پہنچ گئی ہے۔ وزارت قدرتی وسائل و ماحولیات کی جانب سے جاری بیان کے مطابق جنوبی اور وسطی ویتنام میں جاری شدید بارشوں کے نتیجے میں سیلابی تباہی کا سلسلہ برقرار ہے۔
بیان میں بتایا گیا کہ 16 نومبر سے اب تک وسطی صوبے ڈیک لاک میں ہلاکتوں کی تعداد 63 ہو گئی ہے، جبکہ ہزاروں گھر سیلاب کی لپیٹ میں آ گئے ہیں۔
مزید بتایا گیا کہ اس علاقے میں کم از کم 12 افراد لاپتا ہیں جن کی تلاش جاری ہے۔
مقامی میڈیا کے مطابق صوبے میں ہزاروں افراد مشکلات اور نقصانات کا سامنا کر رہے ہیں۔
حکومتی اندازوں کے مطابق پانچ صوبوں میں سیلاب کے باعث مجموعی معاشی نقصان تقریباً 34 کروڑ 30 لاکھ ڈالر تک پہنچ چکا ہے۔
سیلاب سے متاثرہ علاقوں میں امدادی اور بچاؤ کی کارروائیاں جاری ہیں۔
جنوب وسطی ویتنام میں اکتوبر کے آخر سے شدید بارشوں کا سلسلہ جاری ہے جس سے وہاں کے سیاحتی مقامات متاثر ہوئے ہیں۔
ڈیک لاک میں 2 لاکھ ایکڑ رقبے پر پھیلی فصلوں کو نقصان پہنچا جبکہ 32 لاکھ پالتو مویشی ہلاک یا سیلابی پانی میں بہہ گئے۔
ویتنام میں عموماً جون سے ستمبر کے دوران شدید بارشیں ہوتی ہیں مگر سائنسدانوں کے مطابق موسمیاتی تبدیلیوں کے باعث موسمیاتی رجحان تبدیل ہو رہا ہے۔
