روس کی جانب سے یوکرین کے توانائی ڈھانچے اور رہائشی عمارتوں پر درجنوں میزائل اور ڈرون حملوں کے نتیجے میں کم از کم 6 افراد ہلاک اور متعدد زخمی ہوگئے۔ یوکرینی حکام کے مطابق، روسی افواج نے Dnipro شہر میں ایک رہائشی عمارت کو نشانہ بنایا، جس کے نتیجے میں 2 افراد جاں بحق اور 12 زخمی ہوئے، جبکہ Zaporizhzhia میں 3 افراد کے ہلاک ہونے کی اطلاع ہے۔
رپورٹس کے مطابق، روس نے یوکرین کے مختلف حصوں میں 25 مقامات پر حملے کیے، جن میں دارالحکومت کیف بھی شامل ہے۔
یوکرینی وزیراعظم کے مطابق، خارکیف اور کیف کے علاقوں میں بڑی توانائی تنصیبات کو نقصان پہنچا ہے، جس کے باعث کئی علاقوں میں بجلی کی فراہمی معطل ہو گئی ہے۔
حکام کا کہنا ہے کہ متاثرہ علاقوں میں بحالی کا کام جاری ہے۔
یوکرینی فضائیہ نے بتایا کہ روس نے رات کے وقت 450 سے زائد ڈرونز اور 45 میزائل فائر کیے، جن میں سے 406 ڈرونز اور 9 میزائل مار گرائے گئے۔
دوسری جانب، روسی وزارتِ دفاع نے دعویٰ کیا ہے کہ اس کی افواج نے 79 یوکرینی ڈرونز کو تباہ کیا۔
یوکرینی وزارتِ توانائی کے مطابق، Dnipro سمیت کئی علاقوں میں بجلی کی فراہمی متاثر ہوئی ہے اور نظام کی بحالی کے لیے ہنگامی اقدامات کیے جا رہے ہیں۔
روسی حکام کا مؤقف ہے کہ توانائی کے مراکز پر حملے یوکرینی فوجی صلاحیتوں کو کمزور کرنے کے لیے کیے جا رہے ہیں۔
رپورٹ کے مطابق یوکرینی صدر وولودیمیر زیلینسکی نے کہا کہ ان حملوں کے بعد روس پر توانائی کے شعبے پر مغربی پابندیوں میں کوئی نرمی نہیں ہونی چاہیے۔
