بھارت میں ایک بیل پانی کی بلند و بالا ٹینکی پر جا چڑھا، جس کی ویڈیو دیکھتے ہی دیکھتے سوشل میڈیا پر وائرل ہوگئی۔ یہ واقعہ بھارتی ریاست راجستھان کے شہر اجمیر میں پیش آیا، جہاں ایک بیل 60 فٹ اونچی ٹینکی پر چڑھ گیا۔
حیران کن منظر نے دیکھنے والوں کو چونکا دیا اور مقامی انتظامیہ کو بیل کو نیچے اتارنے کے لیے ریسکیو آپریشن شروع کرنا پڑا۔
پہلے مرحلے میں کرین منگوا کر کارروائی کرنے کی کوشش کی گئی، لیکن اندھیرا چھا جانے کے باعث آپریشن رات گئے روک دیا گیا۔
تاہم اگلی صبح، ریسکیو ٹیم کے پہنچنے سے پہلے ہی بیل نے خود ہی نیچے اترنے میں کامیابی حاصل کرلی۔
اس غیرمعمولی واقعے کی ویڈیو نے سوشل میڈیا پر دھوم مچا دی۔ ویڈیو میں بیل کو ٹینکی کے اوپر کھڑا دیکھا جاسکتا ہے جس پر صارفین حیران بھی ہوئے اور ہنسے بھی۔
ایک صارف نے مذاق میں لکھا: “جا کر اُس گائے کی خالہ کو تلاش کرو جس نے شادی سے انکار کیا تھا۔”
ایک اور صارف نے کہا کہ اب تو بسنتی کو بھی اس کا پرپوزل ماننا پڑے گا، کچھ صارفین نے بیل کے ’ریڈ بل‘ یا ’ماؤنٹین ڈیو‘ پینے پر مزاحیہ جملے کسے۔
