چین کا سرکاری میڈیا ملک میں کووڈ 19 کے اعدادوشمار کم ظاہر کر رہا ہے، عالمی ماہرینِ صحت کی تنقید

غیر ملکی خبر رساں ادارے ’رائٹرز‘ کی رپورٹ کے مطابق 7 دسمبر کو چین نے اچانک یوٹرن لیتے ہوئے کورونا پابندیوں میں نرمی کردی تھی جس کے بعد دیگر ممالک نے چین سے آنے والے مسافروں کو لازمی ٹیسٹ کرانے کی ہدایات جاری کی تھیں۔

چین میں گزشتہ سال ’زیرو کووڈ پالیسی‘ کے خلاف احتجاج کے بعد کورونا پابندیوں کی پالیسی میں تبدیلی کی گئی تھی، یہ مظاہرے صدر شی جن پنگ کی صدارت میں عوامی مخالفت کا سب سے بڑا احتجاج تھا۔

بین الاقوامی ماہرین صحت نے دنیا کے سب سے زیادہ آبادی والے ملک میں رواں سال کم از کم 10 لاکھ اموات کی پیش گوئی کی ہے۔

گزشتہ روز چین میں کورونا سے تین اموات رپورٹ ہوئیں، وبائی مرض کے پھیلاؤ سے لے کر اب تک سرکاری اعدادوشمار کے مطابق چین میں 5 ہزار 253 اموات رپورٹ ہوئی ہیں۔

کمیونسٹ پارٹی کے سرکاری اخبار ’پیپلز ڈیلی‘ نے چینی ماہرین کا حوالہ دیتے ہوئے کہا کہ وائرس سے متاثرہ زیادہ تر لوگوں میں بخار کی شدت کم ہے۔

بیجنگ چاؤیانگ ہسپتال کے نائب صدر ٹونگ ژاؤہوئی نے اخبار کو بتایا کہ اس وقت بیجنگ کے ہسپتالوں میں سنگین نوعیت کے مریضوں کی شرح 3 سے 4 فیصد تک ہے۔

سیچوان یونیورسٹی کے ویسٹ چائنا تیانفو ہسپتال کے سربراہ کانگ یان نے کہا کہ گزشتہ تین ہفتوں میں مجموعی طور پر 46 شدید بیمار مریضوں کو آئی سی یو میں داخل کیا گیا ہے، ان میں سے صرف ایک فیصد میں انفیکشن کی علامات ظاہر ہوئی ہیں۔

مقامی حکام صحت نے بتایا کہ صوبہ سیچوان میں رہنے والے 80 فیصد سے زائد افراد کورونا وائرس کے نئے انفیکشن سے متاثر ہوئے ہیں۔

اس سے قبل 30 دسمبر کو عالمی ادارہ صحت (ڈبلیو ایچ او) نے چینی صحت کے حکام پر زور دیا تھا کہ وہ کووڈ کی صورتحال پر باقاعدگی سے حقیقی اعدادوشمار اور معلومات ظاہر کریں۔

عالمی ادارہ صحت نے چینی سائنسدانوں کو تکنیکی مشاورتی گروپ کے اجلاس میں وائرس سے متعلق تفصیلی اعدادوشمار پیش کرنے کی دعوت دی ہے۔

عالمی ادارہ صحت نے چین کے ہسپتالوں میں داخل ہونے والے مریضوں سمیت کورونا سے اموات اور ویکسی نیشن سے متعلق اعدادوشمار شیئر کرنے کی بھی ہدایت کی ہے۔

 

چین کے سرکاری میڈیا ’سی سی ٹی وی‘ کے مطابق بعض یورپی اور امریکی لوگوں کی سیاسی منطق کے مطابق چین کی جانب سے کورونا پابندیاں ہٹانا یا نہ ہٹانا دونوں طرح سے غلط ہے۔