مصر کے علاقے شبرا الخیمہ میں موبائل فون کے چارجر کی شارٹ سرکٹ سے لگی آگ نے ایک پورے خاندان کی زندگی نگل لی۔ باورچی خانے سے شروع ہونے والی آگ چند منٹوں میں اپارٹمنٹ میں پھیل گئی، جس کے نتیجے میں ماں، اس کی بہن اور چار بچے جان کی بازی ہار گئے۔
مصر کے شہر شبرا الخیمہ کے بیجا م علاقے میں جمعرات کی صبح ایک اپارٹمنٹ میں لگی آگ کے نتیجے میں پانچ افراد ہلاک ہو گئے۔
پڑوسیوں کی اطلاع پر سول ڈیفنس اور سکیورٹی فورسز موقع پر پہنچیں اور آگ پر قابو پایا، تاہم حادثے میں متاثرہ خاندان کی جانیں نہیں بچ سکیں۔
ابتدائی تحقیقات کے مطابق آگ موبائل فون کے چارجر کی شارٹ سرکٹ کی وجہ سے لگی۔ عینی شاہدین کے مطابق صبح سات بجے بچوں کی چیخیں سنائی دیں، اور پڑوسی پانی لے کر آگ بجھانے پہنچے، لیکن چند لمحوں میں آگ نے پورے اپارٹمنٹ کو اپنی لپیٹ میں لے لیا۔
موبائل فون چارج کرتے وقت یہ باتیں یاد رکھیں
اپارٹمنٹ کے دروازے پر موجود لوہے کے گیٹ نے بھی اندر داخل ہونے میں تاخیر پیدا کی، جس سے خاندان کو بچانا ممکن نہ ہو سکا۔
ایک عینی شاہد نے بتایا کہ اپارٹمنٹ کے اندر ایک خصوصی ضرورت والے بچے کو روتے ہوئے دیکھا گیا، جو دھویں کی وجہ سے دم گھٹنے سے ہلاک ہوا۔
مقامی میڈیا رپورٹس کے مطابق دیگر افراد کی موت بھی دھویں اور شعلوں کے باعث ہوئی۔ حکام کا کہنا ہے کہ ابتدائی شواہد سے ظاہر ہوتا ہے کہ بجلی کا شارٹ سرکٹ اور حفاظتی اقدامات کی کمی اس المناک حادثے کی بنیادی وجہ ہے۔
