پاکستان سپر لیگ (پی ایس ایل) سیزن فائیو کے غیر ملکی کھلاڑیوں نے وطن واپسی کیلئے کراچی سے دو فلائٹس میں سیٹیں بک کرالیں۔
میڈیا رپورٹس کے مطابق نجی ائیر لائن ای کے-609 اور ای کے-603 سے غیر ملکی کھلاڑی اپنے وطن واپس جائیں گے۔
واپس جانے والے کھلاڑیوں میں پشاور زلمی کے لیونگسٹن، ڈاؤ سن، کارلوس بریتھ ویٹ، گریگری اور ٹام بینٹن شامل ہیں۔
ملتان سلطان کے جیمز ونس اور رائلی روسو جبکہ کراچی کنگز کے ایلیکس ہیلز اور ڈیل پورٹ بھی واپس جارہے ہیں۔
دوسری جانب ترجمان لاہور قلندرز نے واضح کیا ہے کہ لاہور قلندرز کے تمام غیر ملکی کھلاڑی پاکستان میں پی ایس ایل کے میچز کھیلیں گے۔
انہوں نے بتایا کہ تمام غیر ملکی کھلاڑی ٹیم کے ساتھ اور وہ واپس نہیں جارہے۔
گزشتہ روز وزیر اعلیٰ سندھ مراد علی شاہ نے جمعہ سے پی ایس ایل کے میچز خالی اسٹیڈیم میں کرانے کا فیصلہ کیا تھا۔
ان کا کہنا تھا کہ ہم میچز کروا رہے ہیں تاہم مزید رسک نہیں لےسکتے۔ اسٹیڈیم میں میچ ہوں گے لیکن شائقین کو جانے کی اجازت نہیں ہوگی۔
اس ضمن میں ترجمان سندھ حکومت مرتضیٰ وہاب نے اپنی ٹوئٹ میں کہا ہے کہ پی ایس ایل کے بقیہ میچز بغیر تماشائیوں کے ہوں گے۔
انہوں نے کہا کہ یہ فیصلہ پی سی بی سمیت تمام اسٹیک ہولڈرز سےمشاورت کےبعد کیا گیا۔
