برطانیہ کے شہر لندن کے بعد پاکستان سپر لیگ (پی ایس ایل) کا روڈ شو اب امریکی شہر نیو یارک میں بھی منعقد ہوگا۔ امکان ہے کہ نیو یارک میں یہ تقریب آئندہ ہفتے کے اختتام پر ہوگی، جس میں قومی ٹی20 کپتان سلمان علی آغا، ٹیسٹ کپتان شان مسعود اور سعود شکیل شرکت کریں گے۔
اس سے قبل، پاکستان کرکٹ بورڈ (پی سی بی) نے لندن میں پی ایس ایل روڈ شو کے انعقاد کا اعلان کیا تھا، جو 7 دسمبر کو لارڈز کرکٹ گراؤنڈ میں ہوگا۔
لندن روڈ شو میں پی ایس ایل اور پی سی بی کے اعلیٰ عہدیداران کے ساتھ سابق کپتان بابر اعظم، صاحبزادہ فرحان اور حارث روف بھی شریک ہوں گے۔
پی ایس ایل کی بڑھتی ہوئی مقبولیت کے پیشِ نظر دو نئی ٹیموں کی فروخت کی تیاریاں تیز ہو گئی ہیں، جن میں برطانوی سرمایہ کار خصوصی دلچسپی لے رہے ہیں۔
دونوں روڈ شوز میں عالمی سرمایہ کار، کمرشل پارٹنرز اور شائقین کی شرکت متوقع ہے۔
چیئرمین پی سی بی محسن نقوی نے کہا کہ لندن روڈ شو لیگ کے وژن، کمرشل ماڈل اور مستقبل کی حکمت عملی کی ترویج کا موقع ہے، اور یہ تقریب پاکستان کرکٹ کی عالمی سطح پر شناخت کا ثبوت ہے۔
انہوں نے کہا کہ لندن کا روڈ شو ایچ بی ایل پی ایس ایل کی بین الاقوامی اپیل کو مزید فروغ دے گا۔
دوسری جانب، پی ایس ایل کے سی ای او سلمان نصیر کا کہنا تھا کہ پاکستانی لیگ عالمی فالوونگ اور مضبوط کمرشل ویلیو رکھتی ہے، دو نئی ٹیموں کے اضافے سے سرمایہ کاروں کے لیے بڑے مواقع پیدا ہوں گے۔
