قومی کرکٹ ٹیم کے وکٹ کیپر بیٹر سرفراز احمد نے کہا ہے کہ آسٹریلیا سیریز میں دو جوڑیاں فینز کی توجہ کا مرکز ہوں گی، ایک بابر اعظم بمقابلہ اسمتھ اور دوسری اسٹارک بمقابلہ شاہین۔
سرفراز احمد نے پاک آسٹریلیا ٹیسٹ سیریز کے حوالے سے گفتگو کرتے ہوئے کہا کہ بابر بمقابلہ اسمتھ اور اسٹارک بمقابلہ شاہین اس سیریز میں مداحوں کی توجہ کا مرکز ہوں گے۔
انھوں نے کہا بابر اعظم اور اسٹیو اسمتھ دونوں ہی عالمی معیار کے بلے باز ہیں، بینو قادر ٹرافی میں ان دونوں کھلاڑیوں کو لائیو ایکشن میں دیکھنا نوجوان کرکٹرز کے لیے بہترین موقع ہوگا۔
سرفراز احمد نے کہا شاہین آفریدی اور مچل اسٹارک بہترین باؤلرز ہیں جو کسی بھی وقت مخالف ٹیم کو پریشان کر سکتے ہیں، شاہین آفریدی نے گزشتہ سیریز میں ڈیوڈ وارنر کے خلاف شان دار باؤلنگ کا مظاہرہ کیا تھا، اس مرتبہ بھی فینز شاہین آفریدی اور ڈیوڈ وارنر کا ٹاکرا دیکھنے کے منتظر ہوں گے۔
وکٹ کیپر بیٹر نے مزید کہا کہ آسٹریلیا کی کنڈیشنز ہمیشہ چیلنجنگ ہوتی ہیں، میں نے دو مرتبہ آسٹریلیا کا دورہ کیا ہے، یہاں سیکھنے کا بہت موقع ملتا ہے، بیرون ملک مقیم پاکستان کرکٹ فینز ہمیشہ پاکستان ٹیم کی حمایت کرتے ہیں۔
سرفراز احمد نے کہا کہ انھیں یقین ہے کہ آسٹریلیا کے خلاف سیریز میں بھی فینز بڑی تعداد میں اسٹیڈیم کا رخ کریں گے۔
