پارٹی سے کسی نے انحراف کیا تو اجتماعی استعفے دے دیں گے: فاروق ستار

کراچی میں ایم کیو ایم پاکستان کے بہادرآباد میں قائم عارضی مرکز میں پارٹی اجلاس کے بعد پریس کانفرنس کرتے ہوئے فاروق ستار کا کہنا تھا کہ ابتدا میں پارٹی سے جانے والے ارکان شاید مرضی سے گئے ان پر اپنا دعویٰ واپس لیتا ہوں۔

فاروق ستار نے کہا کہ ڈیڑھ سال بعد بھی ثابت قدمی سے پاکستان کے ساتھ کھڑے ہیں لیکن آج بھی معاملہ جوں کا توں ہے اور اراکین پی ایس پی میں جارہے ہیں۔

ایم کیو ایم پاکستان کے سربراہ کا کہنا تھا کہ ارکان سندھ اسمبلی کو وفاداریاں تبدیل کرنے پر مجبور کیا جا رہا ہے اور اس کی وجہ ناقابل فہم ہے، ہمیں یقین ہے کہ یہ اداروں کی پالیسی ہے اور نہ ہی افواج پاکستان کی۔

انہوں نے کہا کہ کوئی دباؤ میں پارٹی چھوڑ کر جاتا ہے تو ہماری دل شکنی ہوتی ہے، ہمارا پارٹی کے کسی رکن پر کوئی دباؤ نہیں اس لئے اگر کوئی بتا کر جاتا ہے تو کوئی مسئلہ نہیں ہے۔

فاروق ستار کا کہنا تھا کہ ہم نےآج آخری مرتبہ اپنے ارکان اسمبلی اور سینیٹرز سے واضح پوچھا کہ وہ مطمئن نہیں تو بتائیں، ہم وزیراعظم اور آرمی چیف تک تحفظات نہ پہنچائیں تو جو چور کی سزا وہ ہماری ہے۔

ایم کیو ایم پاکستان کے رہنما نے کہا کہ آج اجلاس کے دوران تمام سینیٹرز اور صوبائی اسمبلی اراکین سے استعفے جمع کرلئے ہیں جو ہمارے پاس موجود ہیں، اگر کوئی بھی رکن کسی جماعت میں گیا تو اجتماعی استعفے دے دیں گے۔

فاروق ستار نے کہا کہ ہمارے مینڈیٹ کی مسلسل توہین کی جارہی ہے، قومی اور سندھ اسمبلی کے اسپیکر اس معاملے کو دیکھیں، مستعفی اراکین کے استعفے فوری طور پر منظور کیے جائیں، ہم اپنے حلقوں میں عوام کے پاس جانے کو تیار ہیں۔

یاد رہے، سلمان مجاہد بلوچ نے ایم کیو ایم پاکستان میں دھڑے بندیوں کا الزام عائد کیا تھا  اور کہا تھا کہ کنور نوید جمیل اور کشور زہرا براہ راست جب کہ فاروق ستار بالواسطہ الطاف حسین سے رابطے میں ہیں۔

سلمان بلوچ نے یہ بھی الزام لگایا کہ بانی ایم کیو ایم کی سالگرہ کے موقع پر کراچی میں پارٹی رہنما کے گھر تقریب بھی منعقد کی گئی اور بذریعہ واٹس ایپ کال بانی کو سالگرہ پر مبارکباد بھی دی۔

ایم کیو ایم پاکستان کے سربراہ فاروق ستار سلمان مجاہد بلوچ کے الزامات کی سختی سے تردید کرچکے ہیں، جن کا کہنا ہے کہ پارٹی میں دھڑے بندی کسی کی خواہش ہو سکتی ہے لیکن اس میں کوئی حقیقت نہیں ہے۔