صوبائی وزیر ٹرانسپورٹ اینڈ ماس ٹرانزٹ، بلال اکبر خان نے ڈیزل کی قیمت میں کمی کے بعد ٹرانسپورٹ کے کرایوں میں کمی کے لیے اقدامات کا اعلان کیا ہے۔ انہوں نے افسران کو ہدایت کی ہے کہ پیٹرولیم مصنوعات کی موجودہ قیمتوں کے مطابق کرایوں کی نئی لسٹ جاری کی جائے۔ اس کے لیے تمام اضلاع میں ٹرانسپورٹ کرایوں میں کمی کے لیے ٹیمیں تشکیل دے دی گئی ہیں۔
اس کے علاوہ وزیر ٹرانسپورٹ نے زائد کرایہ لینے والےٹرانسپوٹرزکےخلاف سخت کارروائی کرنے اور متعلقہ حکام کو ٹرانسپورٹ کرایوں میں کمی سے متعلق رپورٹ دینےکی ہدایت کی ہے جبکہ زائد کرایہ وصول کرنے والوں سے رقم مسافروں کو واپس کرانے کی بھی ہدایت کی ہے۔
اس حوالے سے وزیرٹرانسپورٹ پنجاب کا کہنا تھا کہ ڈیزل کی قیمتوں میں کمی کا براہ راست فائدہ عوام کو پہنچایا جائےگا، اور زائد کرایہ لینے والوں سےکوئی رعایت نہیں ہوگی۔
