آزاد جموں و کشمیر کی 20 رکنی نئی کابینہ آج ایوانِ صدر مظفرآباد میں حلف اٹھائے گی، جس میں نومنتخب وزیراعظم فیصل ممتاز راٹھور بھی شرکت کریں گے۔ سابق وزیراعظم چوہدری انوارالحق کی کابینہ میں وزیر قانون رہنے والے میاں عبدالوحید کو نئی کابینہ میں سینیئر وزیر کا منصب سونپا جائے گا۔
نئی حکومت کی تشکیل کے لیے بنائی گئی کابینہ میں 18 وزرا اور 2 مشیر شامل ہیں۔
سرکاری ذرائع کے مطابق قائم مقام صدر چوہدری لطیف اکبر وزرا سے حلف لیں گے، جب کہ پیپلز پارٹی کے سیکرٹری اطلاعات سردار جاوید ایوب نے بھی کابینہ کی تشکیل اور آج حلف برداری کی تاریخ کی تصدیق کر دی ہے۔
واضح رہے کہ مشاورتی مراحل مکمل نہ ہونے کی وجہ سے کابینہ کی حلف برداری گزشتہ روز مؤخر کر دی گئی تھی۔
ابتدائی طور پر 10 وزرا شامل کرنے کی تجویز رکھی گئی تھی، لیکن اسمبلی اراکین نے اسے مسترد کر دیا، جس کے بعد گزشتہ دو روز سے مسلسل مشاورت کا عمل جاری رہا۔
اس مشاورتی عمل کی قیادت پیپلز پارٹی کی رہنما فریال تالپور اور نومنتخب وزیراعظم فیصل ممتاز راٹھور کر رہے تھے۔ وزرا کی حتمی فہرست اور محکموں پر اتفاق رائے کے بعد آج حلف برداری کا فیصلہ کیا گیا ہے۔
حلف برداری کے بعد وزیراعظم فیصل ممتاز راٹھور کابینہ کے ارکان کو متعلقہ محکمے الاٹ کریں گے۔
