مسلم لیگ (ن) نے آزاد کشمیر حکومت سے علیحدگی کا اعلان کر دیا ہے۔ مسلم لیگ (ن) آزاد کشمیر کے صدر شاہ غلام قادر نے کہا ہے کہ اگر پیپلز پارٹی تحریک عدم اعتماد لاتی ہے تو یہ ان کا جمہوری حق ہے، لیکن مسلم لیگ (ن) کسی نئی حکومت کا حصہ نہیں بنے گی۔
شاہ غلام قادر نے کہا کہ کسی غیر فطری حکومت سازی میں شامل نہیں ہوں گے اور مسلم لیگ (ن) اب اپوزیشن میں بیٹھے گی۔
انہوں نے واضح کیا کہ جو بھی پارٹی پالیسی سے انحراف کرے گا، اسے کارروائی کا سامنا کرنا پڑے گا، اور نئی حکومت صرف شفاف عام انتخابات کے ذریعے ہی ممکن ہے۔
مسلم لیگ (ن) آزاد کشمیر مہاجرین اور بیرون ملک کشمیریوں کی فلاح و بہبود کے لیے سرگرم رہے گی۔
صدر مسلم لیگ (ن) آزاد کشمیر نے مزید کہا کہ پارٹی ایک منظم اور مقبول جماعت کے طور پر ابھری ہے اور آئینی و سیاسی بحران کے حل میں مثبت کردار ادا کرتی رہے گی۔
انہوں نے کہا کہ آزاد کشمیر میں مضبوط حکومت صرف عام انتخابات کے ذریعے قائم ہو سکتی ہے اور نواز شریف اور شہباز شریف کی قیادت میں بھرپور انتخابی مہم چلائی جائے گی۔
انہوں نے کہا کہ اگرکوئی شخص یاگروہ حکومت سازی میں شمولیت کی سوچ رکھتاہے، وہ شخص جماعتی پالیسیوں سےانحراف کامرتکب ہوگا۔
مسلم لیگ ن کامتفقہ فیصلہ ہےکہ وہ انوارالحق حکومت کاحصہ نہیں رہےگی، مسلم لیگ ن آئندہ اپوزیشن میں رہ کر اپنا کردار ادا کرے گی، مسلم لیگ ن حکومت سازی کی حالیہ کوششوں کابھی حصہ نہیں بنےگی۔
