وزیراعظم شہباز شریف نے کہا ہے کہ نواز شریف کا سب سے بڑا کارنامہ ملک کو ایٹمی قوت بنانا ہے، اور اگر پاکستان ایٹمی طاقت نہ ہوتا تو اس سال جنگ کے حالات بالکل مختلف ہوتے۔ گوجرانوالہ میں ماس ٹرانزٹ منصوبے کی افتتاحی تقریب سے خطاب کرتے ہوئے وزیراعظم نے کہا کہ پورے پاکستان میں ن لیگ کا پرچم بلند رہے گا، اور نواز شریف کی قیادت میں پنجاب میں پہلی بار تعمیراتی سیاست کا آغاز ہوا۔
انہوں نے کہا کہ نواز شریف نے بطور وزیراعلیٰ اور وزیراعظم جو کام کیے، تاریخ ہمیشہ یاد رکھے گی۔
شہباز شریف نے بتایا کہ گوجرانوالہ میں جاری یہ ماس ٹرانزٹ منصوبہ ضلع کی تقدیر بدل دے گا اور شہریوں کو بے پناہ سہولتیں فراہم کرے گا۔
منصوبے سے بچے وقت پر اسکول پہنچ سکیں گے، مزدور اپنے کارخانوں میں، وکلا عدالتوں میں، اور زندگی کے ہر شعبے سے تعلق رکھنے والے شہری مستفید ہوں گے۔
وزیراعظم نے کہا کہ نواز شریف نے لاہور میں دل کے امراض کا پہلا اسپتال تعمیر کروایا اور عام آدمی کے لیے ترقیاتی منصوبے شروع کیے۔
انہوں نے دوبارہ زور دیتے ہوئے کہا کہ نواز شریف کا سب سے بڑا کارنامہ ملک کو ایٹمی قوت بنانا ہے، اور اگر پاکستان ایٹمی ہتھیار نہ رکھتا تو اس سال جنگ کے حالات یکسر مختلف ہوتے۔
شرکاء سے مخاطب ہوئے شہباز شریف نے کہا کہ لاہور کا شمار دنیا کے آلودہ ترین شہروں میں ہوتا تھا مگر اسموگ میں آج کمی آئی ہے تو اس پر مریم نواز اور ان کی ٹیم کو شاباش ملنی چاہیے، یہ تمام کام کوئی چاہے بھی تو اس کو چھپا نہیں سکتا اور مخالف کو بھی ان کاموں کا اقرار کرنا پڑےگا۔
