ملکی سلامتی اور شہری تحفظ پر کوئی سمجھوتہ نہیں ہوگا: فیلڈ مارشل

آئی ایس پی آر نے بتایا کہ ورکشاپ کے شرکا کو غیر قانونی سرگرمیوں کے خلاف جاری قومی اقدامات، منشیات کی اسمگلنگ اور منظم جرائم پیشہ نیٹ ورکس کے خلاف کارروائیوں اور بہتر بارڈر کنٹرولز و غیر قانونی غیر ملکیوں کی واپسی کے حوالے سے بھی بریفنگ دی گئی۔

ورکشاپ سے خطاب کرتے ہوئے فیلڈ مارشل عاصم منیر نے کہا کہ انٹیلی جنس اور قانون نافذ کرنے والے ادارے بھی ملکی سلامتی کے لیے بھرپور پیشہ ورانہ مہارت اور عزم کا مظاہرہ کر رہے ہیں۔

انہوں نے بتایا کہ علاقائی صورت حال تیزی سے بدل رہی ہے، جس میں بڑھتی ہوئی جیوپولیٹیکل مسابقت، سرحد پار دہشتگردی اور ہائبرڈ حربوں کے اثرات نمایاں ہیں۔

فیلڈ مارشل نے مزید کہا کہ پاکستان ایک اہم ملک ہے اور عالمی سطح پر اپنی درست حیثیت کے مطابق مقام حاصل کرنے کے لیے پُرعزم ہے۔

انہوں نے کہا کہ معرکہ حق میں پاک افواج کی پیشہ ورانہ صلاحیت، جذبے اور عزم نے عالمی سطح پر پاکستان کے وقار میں اضافہ کیا ہے، اور ہماری سب سے بڑی طاقت قومی یکجہتی ہے۔

انہوں نے مزید کہا کہ پاکستان آرمی کے لیے ملک کی سرحدی سالمیت، سکیورٹی اور ہر پاکستانی شہری کا تحفظ اولین ترجیح ہے، ملک کی سرحدی سالمیت، سکیورٹی اور ہر شہری کے تحفظ میں کسی قسم کا سمجھوتہ نہیں کیا جائے گا، ہم ان شاء اللہ اپنے دشمنوں کے تمام مذموم عزائم کو ناکام بنائیں گے۔

فیلڈ مارشل عاصم منیر نے وفاقی و صوبائی حکومتوں کے ساتھ مکمل تعاون کے عزم کا اعادہ کیا اور کہا کہ دیرپا امن، استحکام اور خوشحالی کے لیے مربوط قومی کاوشیں اور ادارہ جاتی ہم آہنگی نہایت ضروری ہیں۔