عمران اسماعیل کا شاہ محمود قریشی کے متعلق بڑا بیان، پارٹی میں الگ گروپ بنانے کا انکشاف

گزشتہ روز سابق وزیرخارجہ شاہ محمود قریشی سے منسوب یہ دعویٰ میڈیا پر زیرِ گردش رہا کہ 9 مئی کے بعد پی ٹی آئی چھوڑنے والوں نے اڈیالہ جیل میں اُن سے ملاقات کی تھی۔

انہوں نے کہا تھا کہ عمران اسمعٰیل، فواد چوہدری، عامر کیانی اور مولوی محمود ان سے اڈیالہ جیل میں ملاقات کے لیے آئے تھے اور کہا تھا کہ پارٹی چھوڑ دو، ہم آزاد حیثیت میں الیکشن لڑیں گے۔

عمران اسمعٰیل نے ’ایکس‘ پر ایک پوسٹ میں اس ملاقات کی تصدیق کرتے ہوئے واضح کیا کہ میری شاہ محمود قریشی سے جیل میں ملاقات ہوئی تھی لیکن ریکارڈ کی درستگی کے لیے یہ بات کہنا چاہتا ہوں کہ میں نے ان سے کبھی پی ٹی آئی چھوڑنے کی بات نہیں کی۔

میری شاہ محمود قریشی سے جیل میں ملاقات ہوئی تھی - میں ریکارڈ کی درستگی کے لیے یہ بات کہنا چاہتا ہوں کہ میں نے ان سے کبھی PTI چھورنے کی بات نہیں کی- یہ ملاقات شاہ صاحب کی خواہش پر ہوئی تھی- شاہ صاحب اپنا گروپ تشکیل دینا چاہیے تھے جس پر ہم نے ساتھ دینے سے معذرت کی-

— Imran Ismail (@ImranIsmailPTI) January 16, 2024

انہوں نے مزید لکھا کہ یہ ملاقات شاہ صاحب کی خواہش پر ہوئی تھی، شاہ صاحب اپنا گروپ تشکیل دینا چاہیے تھے جس پر ہم نے ساتھ دینے سے معذرت کی۔