نگران وزیراعظم انوار الحق کاکڑ کے اثاثوں کی تفصیلات سامنے آگئیں۔
میڈیا رپورٹ کے مطابق نگران وزیراعظم انوار الحق کاکڑ 4 کروڑ 81 لاکھ 82 ہزار 580 روپے کے اثاثوں کے مالک ہیں، ان کی 20 ایکڑ وراثتی زرعی زمین 80 لاکھ روپے کی ہے۔
رپورٹ کے مطابق نگران وزیراعظم انوار الحق کاکڑ کے چاغی مائننگ لمیٹڈ میں 50 ہزار کے شیئرز ہیں، انہوں نے 10 تولے سونے کی قیمت 80 ہزار روپے ظاہر کی ہے۔
اس کے علاوہ انوارالحق کاکڑ کے پاس 2 بینکوں میں 2 کروڑ 20 لاکھ روپے سے زائد ہیں، نگران وزیراعظم نے اپنے گھر کے فرنیچر کی مالیت 4 لاکھ روپے ظاہر کی ہے۔
دوسری جانب نگران وزیر خزانہ شمشاد اختر کے اثاثوں کی تفصیلات بھی سامنے آ گئیں، شمشاد اختر نے کراچی ڈی ایچ اے 6 میں 40 لاکھ روپے کا گھر ظاہر کیا ہے جس میں ایک پلاٹ کی قمیت 1 لاکھ 25 ہزار ظاہر کی گئی ہے۔
نگران وزیر خزانہ نے اثاثوں میں 2 اراضی کو والد سے گفٹ ظاہر کیا، انہوں نے 2 ارب 79 کروڑ روپے کے نیا پاکستان سرٹیفکیٹ حاصل کر رکھے ہیں۔
رپورٹ کے مطابق شمشاد اختر نے ٹی بلز کی مد میں 10 کروڑ 96 لاکھ روپے، ٹی ڈی آربینک الحبیب میں 2 کروڑ 41 لاکھ روپے ظاہر کیے۔
نگران وزیر خزانہ شمشاداختر کے پاس صرف 2 لاکھ روپے مالیت کا سونا ہے، کیش رقم میں 19 لاکھ 46 ہزار روپے جبکہ بینکوں میں 39 لاکھ 24 ہزار ہیں، انہوں نے اثاثوں میں فرنیچر کی مالیت 2 لاکھ روپے ظاہر کی ہے۔
