استحکام پاکستان پارٹی کے رہنما عون چوہدری اور نعمان لنگڑیال نے وزیراعظم کے معاونین کے عہدے سے استعفے دے دیے۔
ذرائع کے مطابق عون چوہدری اور نعمان لنگڑیال نے استعفے جہانگیرترین کو جمع کرادیے ہیں۔ استحکام پاکستان پارٹی کے رہنما عبدالعلیم خان نے دونوں رہنماؤں کو مستعفی ہونے کی ہدایت کی تھی۔
یاد رہے کہ جہانگیر ترین کی سرپرستی میں گزشتہ دنوں استحکام پاکستان پارٹی تشکیل دی گئی تھی جس میں تحریک انصاف کے بیشتر رہنما شامل ہوگئے ہیں جبکہ جہانگیر ترین گروپ میں شامل رہنما تو شروع دن سے استحکام پاکستان پارٹی کے ساتھ ہیں۔
یہ بھی پڑھیں: استحکام پاکستان پارٹی کا عقاب کے نشان پر انتخابات لڑنے کا فیصلہ
عون چوہدری اور نعمان لنگڑیال نے استحکام پاکستان پارٹی میں شمولیت کے باوجود وزیراعظم کے معاونین کے عہدے اپنے پاس رکھے تھے تاہم اب پارٹی پالیسی کی وجہ سے انھیں مستعفی ہونا پڑ گیا ہے۔
دوسری جانب استحکام پاکستان پارٹی کے صدر علیم خان سے پارٹی رہنما نعمان لنگڑیال اور امیر حیدر سنگھا نے ملاقات کی ہے۔
صدر استحکام پاکستان پارٹی سے نعمان لنگڑیال اور امیر حیدر سنگھا کی ملاقات میں مجوزہ منشور، انتخابی حکمت عملی اور دیگر امور پر مشاورت ہوئی۔
عبد العلیم خان نے دونوں رہنماوں کو اپنے علاقوں میں عوامی رابطے اور سیاسی سرگرمیاں تیز کرنے کی ہدایت کی۔
