وزیراعظم شہباز شریف کی کابینہ نے حلف اٹھالیا۔ چیئرمین سینیٹ و قائم مقام صدر صادق سنجرانی نے کابینہ سے حلف لیا۔
وفاقی کابینہ کی تقریب حلف برداری ایوان صدر میں ہوئی جہاں چیئرمین سینیٹ و قائم مقام صدر صادق سنجرانی نے پہلے وفاقی وزرا سے حلف لیا جس کے بعد انہوں نے وزرائے مملکت سے حلف لیا۔
کابینہ میں 31 وفاقی وزرا اور 3 وزرائے مملکت ہیں جب کہ تین مشیر بھی کابینہ کا حصہ ہیں۔
وفاقی کابینہ میں (ن) لیگ کے 14 اور پیپلزپارٹی کے 9 ارکان شامل ہیں جب کہ بلوچستان عوامی پارٹی اور جمہوری وطن پارٹی سے ایک ایک، جے یو آئی کے 4 اور ایم کیو ایم کے 2 ارکان کابینہ کا حصہ ہیں۔
کابینہ میں کونسے نام شامل؟
(ن) لیگ کے خواجہ آصف، احسن اقبال، رانا ثنا اللہ، ایاز صادق، خرم دستگیر، راناتنویر،مریم اورنگزیب، سعدرفیق، ریاض حسین پیرزادہ، اعظم نذیر تارڑ اور جاوید لطیف کابینہ کا حصہ ہیں۔
پیپلز پارٹی کے خورشید شاہ، نوید قمر، شیری رحمان، مرتضیٰ محمود، احسان الرحمان مزاری، عابد حسین بھایو اور شازیہ مری کابینہ میں شامل ہیں جب کہ ایم کیو ایم کے امین الحق اور فیصل سبزواری کابینہ کا حصہ ہیں۔
جے یو آئی (ف) کے اسعد محمود ، مولانا عبدالواسع، مفتی عبدالشکور، طلحہٰ محمود، بی اے پی کے اسرار ترین، نوابزادہ شاہ زین بگٹی، طارق بشیر چیمہ وفاقی کابینہ میں شامل ہیں جب کہ عائشہ غوث پاشا، حنا ربانی کھر اور عبدالرحمان کانجو وزیر مملکت ہیں۔
اس کے علاوہ قمر زمان کائرہ، انجینئر امیر مقام اور عون چوہدری کو بطور مشیر کابینہ میں شامل کیا گیا ہے۔
