سائنسدانوں نے ایک نئی قسم کی کم کیلوریز کیساتھ انسولین نہ بڑھانے والی قدرتی شکر تیارکرنے کا مؤثر طریقہ دریافت کر لیا ہے جو عام چینی جیسا ہی ذائقہ رکھتی ہے۔
یہ تحقیق امریکی یونیورسٹی ٹفٹس کے سائنسدانوں نے بائیوٹیک کمپنیوں کے اشتراک سے کی ہے۔ تحقیق کے نتائج سائنسی جریدے سیل رپورٹ فیزیکل سائنس میں شائع ہوئے ہیں۔
ٹاگاٹوز نامی یہ نئی قسم کی شکر عام چینی کے مقابلے میں تقریباً 92 فیصد مٹھاس رکھتی ہے مگر اس میں کیلوریز صرف ایک تہائی ہیں۔
ماہرین کے مطابق یہ شکر خون میں گلوکوز کی سطح کو زیادہ نہیں بڑھاتی جس کی وجہ سے یہ ذیابیطس اور انسولین سینسیٹیویٹی کے شکار افراد کے لیے ایک بہتر متبادل بن سکتی ہے۔
ٹاگاٹوز قدرتی طور پر پھلوں اور دودھ میں بہت کم مقدار میں پایا جاتا ہے جس کے باعث اس کی کمرشل پیداوار محدود ہے تاہم سائنس دانوں نے ای کولی (E. coli) بیکٹیریا کو جینیاتی طور پر تبدیل کر کے انہیں ننھی فیکٹریوں میں بدل دیا ہے جو گلوکوز کو انتہائی مؤثر انداز میں ٹاگاٹوز میں تبدیل کرتے ہیں۔
اس طریقے سے 95 فیصد تک پیداوار حاصل کی گئی ہے جو موجودہ طریقوں سے کہیں زیادہ ہے۔
ماہرین کا کہنا ہے کہ ٹاگاٹوز دانتوں کے لیے بھی محفوظ ہے، نقصان دہ بیکٹیریا کی افزائش کم کرتی ہے اور بیکنگ میں بھی استعمال کی جا سکتی ہے۔
سائنسدانوں کے مطابق اس میں مزید بہتری کے بعد یہ طریقہ صحت بخش شکر کے وسیع استعمال کی راہ ہموار کرنے میں معاون ثابت ہوگا۔
