سردیوں کے موسم میں خشکی اور خشک جلد کی شکایت عام ہو جاتی ہے۔ ہاتھوں کی خشکی، پھٹے ہونٹ اور خشک پاؤں سب سے زیادہ پریشان کن ہوتے ہیں۔ خشک اور بے جان ہاتھ نہ صرف بدصورت لگتے ہیں بلکہ خود اعتمادی پر بھی اثر ڈال سکتے ہیں۔
اگر آپ بار بار موئسچرائزر لگانے کے باوجود بھی ہاتھ خشک محسوس کرتے ہیں تو اس کا حل ایک آسان اسکن کیئر ہیک میں چھپا ہے۔
یہ ہیک آپ کے ہاتھوں کو نرم، ملائم اور چمکدار بنانے میں مدد کرے گا۔ حقیقت یہ ہے کہ سردیوں میں ہاتھوں کی جلد پر مردہ خلیے جمع ہو جاتے ہیں جو خشکی کو بڑھاتے ہیں۔
ان مردہ خلیوں کو ہٹانے کے بعد جلد بہتر طریقے سے نمی جذب کرے گی اور ہاتھ زیادہ صحتمند لگیں گے۔
نمک اور موئسچرائزر ہیک:
کوئی بھی موئسچرائزر یا باڈی لوشن لیں اور اس میں دو چمچ نمک ملا لیں۔
اس مکسچر کو دونوں ہاتھوں پر لگا کر اچھی طرح مساج کریں۔ نمک ہلکے اسکرب کی طرح کام کرے گا اور مردہ جلد صاف کرے گا، جبکہ موئسچرائزر جلد کو گہرائی تک نمی فراہم کرے گا۔
ہاتھوں کو مساج کرنے کے بعد صرف پانی سے دھو لیں، صابن استعمال نہ کریں تاکہ جلد کی نمی برقرار رہے۔
اس طریقے سے نہ صرف ہاتھ نرم اور خوبصورت نظر آئیں گے بلکہ جلد بھی صحت مند اور ہائیڈریٹڈ رہے گی۔
زیتون یا ناریل کے تیل کا استعمال
اگر آپ قدرتی اجزاء کے ساتھ اپنی جلد کی دیکھ بھال کرنا چاہتی ہیں، تو نمک کے ساتھ زیتون کا تیل یا ناریل کا تیل استعمال کریں۔
اس تیل کو نمک کے ساتھ ملا کر ہاتھوں پر مساج کریں اور پھر دھو لیں۔ یہ آپ کی جلد کو قدرتی طریقے سے نرم اور نمی بخشے گا۔
خیال رکھیں کہ اگر آپ کو بلڈ پریشر سے متعلق کوئی بیماری ہے تو نمک کو ہاتھوں پر رگڑنے سے گریز کریں۔
کیونکہ نمک جسم میں سوڈیم کی مقدار بڑھا سکتا ہے، جو کہ ہائی بلڈ پریشر کے مریضوں کے لیے خطرناک ہو سکتا ہے۔
اس ہیک کو آزما کر آپ سردیوں میں اپنے ہاتھوں کو خشکی اور بے جان پن سے بچا سکتی ہیں اور جلد کو نرم و ملائم بنا سکتی ہیں۔
