معروف فلمی جوڑی ریمبو (افضل خان) اور صاحبہ کے بیٹے احسن افضل خان نے بھی شوبز میں اپنا سفر شروع کر دیا ہے۔ اسٹار جوڑی کے نووارد اداکار اس وقت ڈرامہ لاڈلی میں جلوہ گر ہیں۔ والدین بیٹے کی کارکردگی سے خوش نظر آتے ہیں، مگر مداحوں کی رائے کچھ مختلف ہے۔
کئی ناظرین نے احسن افضل کی اداکاری میں اوور ایکٹنگ، کمزور ڈائیلاگ ڈلیوری اور غیر فطری جذبات کے اظہار پر تنقید کی۔
تاہم کچھ صارفین نے اُن کی حوصلہ افزائی کرتے ہوئے کہا کہ احسن میں باصلاحیت اداکار بننے کی پوری صلاحیت موجود ہے، وہ ابھی نوجوان ہیں اور اُنہیں سیکھنے اور نکھرنے کا موقع ملنا چاہیے۔
ایک صارف نے لکھا کہ احسن کی جین میں اداکاری ہے اور وہ جلد اپنا مقام حاصل کرلے گا۔
اکثر صارفین نے والدین کے انڈسٹری میں بڑے نام کو استعمال کرکے کامیابی حاصل کرنے کی کوشش کرنے والی اولادوں کو تنقید کا نشانہ بنایا۔
ریمبو اور صاحبہ کے چاہنے والوں نے احسن کو مشورہ دیا ہے کہ زندگی میں منفی تنقید اور تبصروں کو اہمیت نہ دو۔ انھیں اپنا جواب اپنی کارکردگی سے دو۔
خیال رہے کہ احسن افضل خان اس سے قبل بھی ڈراموں میں کردار نبھا چکے ہیں۔ وہ بہت آہستگی مگر مستقل مزاجی کے ساتھ اپنا مقام بنا رہے ہیں۔
