اٹلی نے پاکستان کو آئندہ 3سال کیلئے ہزاروں نوکریوں میں کوٹہ الاٹ کر دیا۔
ترجمان وزارت اوورسیز پاکستانیز کی جانب سے بتایا گیا ہے کہ اٹلی سے ساڑھے 10 ہزار نوکریوں کا کوٹہ لینے میں کامیاب ہوگئے ہیں۔
ترجمان نے بتایا کہ اٹلی نے پاکستان کو آئندہ تین سال کیلئے نوکریوں میں کوٹہ الاٹ کردیا ہے، جس کے بعد اٹلی یورپ کا پہلا ملک ہے جس نےپاکستان کیلئے نوکریوں میں کوٹہ الاٹ کیا۔
ترجمان وزارت اوورسیز پاکستانیزکے مطابق 3500 پاکستانی ہرسال سیزنل اور نان سیزنل کوٹہ پر اٹلی روزگار کیلئے جائیں گے، 1500پاکستانی سیزنل کوٹے، 2 ہزار نان سیزنل کوٹے پر ہر سال اٹلی جائیں گے، شپ بریکنگ، ہیلتھ کیئراور شعبہ زراعت میں نوکریوں کا کوٹہ الاٹ کیا گیا ہے۔
اس کے علاوہ پاکستانی ہنرمند و نیم ہنرمند ورکرز ان شعبوں میں روزگار کیلئےاٹلی جائیں گے، پاکستان کیلئے ویلڈرز، ٹیکنیشن، شیف، ویٹرز اور ہاؤس کیپنگ میں روزگار کے مواقع ہیں جبکہ نرسنگ، میڈیکل ٹیکنیشن، فارمنگ اورکاشتکاری کےشعبوں میں روزگارکے مواقع بھی موجود ہیں۔
ترجمان اوور سیز کے مطابق فروری میں پاکستان اٹلی کا جوائنٹ ورکنگ گروپ کا دوسرا اجلاس اسلام آباد میں ہوگا۔
اسی حوالے سے وفاقی وزیر برائے اوور سیز چوہدری سالک حسین نے کہا کہ اٹلی کا پاکستان کیلئے نوکریوں میں کوٹہ مختص کرنا اہم سنگ میل ہے، اٹلی میں پاکستانی ورک فورس کیلئے روزگار کے دروازے کھلنے جارہے ہیں اور جلد یورپ کے مزید ممالک کے دروازے پاکستانی ورک فورس کیلئے کھلیں گے۔
انہوں نے یہ بھی کہا کہ یہ پاکستان کیلئے یورپین لیبرمارکیٹ میں روزگار کے نئے مواقعوں کی تلاش میں اہم سنگِ میل ہے، حکومت پاکستان اپنے محنت کشوں کوعالمی سطح پر باعزت روزگار فراہم کرنے کیلئے مسلسل کوشاں ہے۔
چوہدری سالک حسین نے مزید کہا کہ اوورسیز پاکستانیز دنیا بھر میں پاکستان کے سفیر اور ملکی معیشت میں ریڑھ کی ہڈی کا کردار ادا کر رہے ہیں۔
