برطانوی نشریاتی ادارے بی بی سی نے امریکی صدر ڈونلڈ ٹرمپ سے اُن کی تقریر کی غلط ایڈیٹنگ پر معذرت تو کرلی، تاہم مالی معاوضہ دینے سے انکار کردیا ہے۔ ادارے نے اعتراف کیا کہ 6 جنوری 2021 کی ٹرمپ کی تقریر کے مختلف حصوں کو اس طرح جوڑا گیا کہ یہ تاثر پیدا ہوا جیسے ٹرمپ نے براہِ راست تشدد پر اُکسایا ہو۔
بی بی سی نے وضاحت کی کہ وہ اس غلط تدوین پر افسوس کا اظہار کرتا ہے اور یقین دہانی کرائی ہے کہ 2024 میں نشر کی جانے والی ٹرمپ سے متعلق ایڈٹ شدہ دستاویزی فلم دوبارہ نہیں دکھائی جائے گی۔
ادارے کے مطابق اس واقعے کے نتیجے میں ڈائریکٹر جنرل ٹِم ڈیوی اور ہیڈ آف نیوز ڈیبرہ ٹرنس پہلے ہی اپنے عہدوں سے مستعفی ہوچکے ہیں۔
یاد رہے کہ امریکی صدر نے اپنی تقریر کی متنازع ایڈیٹنگ پر بی بی سی کو ایک ارب ڈالر کے ہرجانے کا نوٹس دینے کی دھمکی دی تھی۔
بی بی سی کے وکلا نے بتایاکہ انہوں نے ٹرمپ کی قانونی ٹیم کی جانب سے موصول ہونے والے خط کا جواب دے دیا ہے ، میڈیا رپورٹ کے مطابق صدر ٹرمپ کے وکلا نے بی بی سی کو خط کا جواب دینے کیلئے آج شام 5 بجے تک کی مہلت دی تھی۔
