کانگریس رہنما راہول گاندھی نے بہار کے ضلع بھگلپور میں انتخابی جلسے کے دوران وزیر داخلہ امت شاہ کے بیٹے اور آئی سی سی کے چیئرمین جے شاہ پر سخت تنقید کی ہے۔
راہول گاندھی نے کہا کہ ’’جے شاہ کو بیٹ پکڑنا بھی نہیں آتا، لیکن وہ دنیا کی کرکٹ کا سربراہ بنے ہوئے ہیں۔‘‘
انہوں نے الزام لگایا کہ بھارت میں اگر کوئی اڈانی، امبانی یا امت شاہ کا بیٹا نہیں ہے تو وہ بڑے خواب نہیں دیکھ سکتا۔
انہوں نے مزید کہا کہ ’’امت شاہ کا بیٹا بیٹ پکڑنا نہیں جانتا، رن بنانا تو دور کی بات، مگر کرکٹ کی دنیا پر راج کر رہا ہے — آخر کیوں؟ صرف دولت اور طاقت کی وجہ سے۔‘‘
راہول گاندھی نے دعویٰ کیا کہ ملک میں کھیلوں سے لے کر کاروبار تک، ہر بڑا شعبہ چند امیر گھرانوں کے کنٹرول میں ہے، جبکہ عام نوجوانوں کے لیے ترقی کے دروازے بند ہیں۔
واضح رہے کہ جے شاہ دسمبر 2024 سے انٹرنیشنل کرکٹ کونسل کے چیئرمین کے طور پر خدمات انجام دے رہے ہیں۔
اس سے قبل وہ 2019 سے 2021 تک بھارت کرکٹ بورڈ کے سیکریٹری رہ چکے ہیں اور اس سے پہلے گجرات کرکٹ ایسوسی ایشن سے وابستہ تھے۔
راہول گاندھی نے اپنی تقریر میں مزید کہا کہ مودی حکومت نے جی ایس ٹی نافذ کر کے کسانوں، مزدوروں اور چھوٹے کاروباریوں کو نقصان پہنچایا۔
انہوں نے الزام عائد کیا کہ این ڈی اے حکومت غریبوں کی زمین چھین کر اڈانی اور امبانی جیسے بڑے صنعت کاروں کو دے رہی ہے۔
واضح رہے کہ بہار اسمبلی کی 243 نشستوں میں سے 122 نشستوں پر دوسرے مرحلے کا الیکشن 11 نومبر کو ہوگا، جبکہ نتائج 14 نومبر کو جاری کیے جائیں گے۔
