اقوام متحدہ نے پاکستان میں حالیہ سیلاب کے باعث قیمتی انسانی جانوں کے ضیاع پر گہرے دکھ اور افسوس کا اظہار کیا ہے۔ ترجمان کے مطابق ادارہ متاثرہ خاندانوں کے ساتھ ہمدردی اور یکجہتی کا اظہار کرتا ہے اور حکومتِ پاکستان کے ساتھ مکمل تعاون کی یقین دہانی کراتا ہے۔ اقوام متحدہ کا کہنا ہے کہ سیلاب متاثرین کو فوری انسانی امداد، خوراک، صاف پانی اور طبی سہولیات فراہم کرنے کے لیے عالمی برادری کو متحرک کیا جا رہا ہے تاکہ مصیبت کی اس گھڑی میں متاثرہ افراد کی زیادہ سے زیادہ مدد کی جا سکے۔
تفصیلات کے مطابق یو این سیکریٹری جنرل انتونیو گوتریس کے ترجمان نے پاکستان میں سیلاب سے تباہی پر جاری بیان میں کہا کہ پاکستان میں حالیہ سیلاب سے اموات پر وہ شدید غمزدہ ہیں۔
ترجمان سیکریٹری جنرل نے کہا سیلاب میں 400 جانیں گئیں، اور 15 لاکھ افراد متاثر ہوئے، اور لاکھوں افراد کواس وقت امداد کی ضرورت ہے۔
ترجمان نے کہا کہ انتونیو گوتریس نے پنجاب میں 10 لاکھ سے زائد افراد کی نقل مکانی پر پاکستانی حکام کو سراہا۔
سیکریٹری جنرل اقوام متحدہ نے تکلیف کی اس گھڑی میں پاکستانی حکومت اور عوام کے ساتھ اظہار یکجہتی کیا۔
گوتریس نے پیغام میں کہا میں غمزدہ خاندانوں سے تعزیت اور زخمیوں کی صحت یابی کے لیے دعاگو ہوں۔
ترجمان نے بتایا کہ پاکستان میں سیلاب متاثرین کے ریلیف اور ان کی بحالی کی کوششوں میں مدد کے لیے 6 لاکھ ڈالر جاری کیے ہیں۔
واضح رہے کہ سیلاب اور بارش نے ایک ساتھ اب صوبہ سندھ کے لیے خطرے کی گھنٹی بجا دی ہے۔
این ڈی ایم اے آفیشل نے سیلابی صورت حال پر بریفنگ دیتے ہوئے بتایا کہ پنجند سے سیلابی ریلا سندھ میں داخل ہوگا۔
کئی مقامات پر اس وقت انتہائی اونچے درجے کا سیلاب ہے۔ حکام کے مطابق ہیڈ پنجند سے بڑا سیلابی ریلا گڈو بیراج کی طرف جائے گا۔
اور 6 تاریخ کو بھارت سے سندھ میں بارشوں کا سسٹم بھی داخل ہوگا، جس سے ٹھٹہ، سجاول، میرپورخاص اور بدین میں 6 سے 10 تاریخ تک بارش ہوگی۔
