بھارتی فوج کے ریٹائرڈ میجر جنرل یش مور نے حالیہ پاک-بھارت کشیدگی اور بھارت کی جنگی پالیسیوں پر مودی حکومت کو شدید تنقید کا نشانہ بنایا ہے۔ ایش مور کا کہنا ہے کہ پاک-بھارت جنگ کے بعد پاکستان آرمی چیف اور افواج پاکستان کا وقار مزید بڑھ گیا ہے اور امریکی صدر ڈونلڈ ٹرمپ نے بھی پاکستانی آرمی چیف کو ملاقات کی دعوت دی۔
انہوں نے انٹرویو میں کہا کہ پاکستان آرمی اور اس کی قیادت کو عالمی سطح پر نمایاں مقام حاصل ہوا، لیکن بھارت میں ہماری بات سنی نہیں گئی۔
ایش مور نے آپریشن سندور کے دوران بھارت کے رویے اور میڈیا کے اقدامات پر بھی تنقید کی، کہا کہ بھارت ایک حملہ آور ریاست کی طرح دکھائی دیا اور انٹرنیشنل میڈیا نے بھارتی میڈیا کو جھوٹا قرار دے کر ملکی ساکھ کو نقصان پہنچایا۔
انہوں نے مزید کہا کہ بھارت میں ریٹائرڈ فوجی افسران بھی مودی حکومت کے دعوؤں کو جھوٹا قرار دے رہے ہیں اور پاکستانی موقف کی حمایت کر رہے ہیں۔
میجر جنرل (ر) یش مور نے سوال اٹھایا کہ بھارت کب تک اپنے ہمسایہ ممالک کے ساتھ محاذ آرائی کی پالیسی پر گامزن رہے گا؟ کیا مستقل جنگی ماحول ہی بھارت کا مستقبل ہے؟
انہوں نے بھارتی میڈیا کو آڑے ہاتھوں لیتے ہوئے کہا کہ جنگی صورتحال کے دوران میڈیا نے ذمہ داری کا مظاہرہ کرنے کے بجائے سنسنی خیزی، جھوٹ اور افواہوں کو فروغ دیا۔
انھوں نے کہا کہ جنگ کے دوران بھارتی میڈیا نے کھلے عام جھوٹ بولے، جھوٹے دعوے کیے جیسے ”اسلام آباد پہنچنا“ اور ”کراچی کو آگ لگانا“ جیسے غیر ذمہ دارانہ بیانات دیے، جن سے بھارت کی عالمی سطح پر جگ ہنسائی ہوئی۔
انہوں نے افسوس کا اظہار کرتے ہوئے کہا کہ بھارتی میڈیا، سوشل میڈیا، یوٹیوبرز اور بعض نام نہاد سلیبریٹیز نے بھی غیر مہذب اور شرمناک زبان استعمال کی، جس کے باعث دنیا نے بھارت کو سنجیدگی سے لینا چھوڑ دیا۔
یش مور کا کہنا تھا کہ ایسے غیر ذمہ دارانہ رویوں نے نہ صرف بھارت کی عالمی ساکھ کو مجروح کیا بلکہ جنگی حالات میں بھی عوام کو گمراہ کیا۔
