امریکی وزیر خزانہ اسکاٹ بیسنٹ ناراضگی کا اظہار کرتے ہوئے کہا کہ بھارت ہٹ دھرمی پر اڑا ہوا ہے۔ غیر ملکی میڈیا کے مطابق ایک انٹرویو میں اسکاٹ بیسنٹ نے بتایا کہ سوئٹزرلینڈ اور بھارت سمیت کئی ممالک کے ساتھ تجارتی معاہدے ابھی مکمل ہونا باقی ہیں۔
انہوں نے کہا کہ بھارت امریکہ کے ساتھ مذاکرات میں سخت رویہ اختیار کیے ہوئے ہے اور امید ہے کہ ٹرمپ انتظامیہ اکتوبر کے آخر تک تجارتی مذاکرات مکمل کر لے گی۔
امریکی وزیر خزانہ نے یہ بھی کہا کہ امریکی حکام اگلے 2 سے 3 ماہ میں چینی حکام سے دوبارہ ملاقات کریں گے تاکہ دونوں ممالک کے درمیان معاشی تعلقات کے مستقبل پر بات چیت کی جا سکے۔
ان کا کہنا تھا کہ انہیں توقع ہے کہ ہم تمام ممالک کے ساتھ متعدد شرائط پر اتفاق کر لیں گے۔
دوسری جانب، امریکی محکمہ خارجہ کے ترجمان ٹیمی بروس نے کہا کہ پاکستان اور بھارت کے درمیان تنازع کے دوران امریکہ کا تجربہ رہا ہے کہ یہ جنگ ایک خوفناک رخ اختیار کر سکتی تھی۔
اس صورتحال کو قابو پانے کے لیے نائب صدر، صدر اور وزیر خارجہ نے بروقت مداخلت کی۔
انہوں نے کہاکہ فریقین کو قریب لا کر کچھ پائیدار تخلیق کیا۔یہ قابل فخر لمحہ ہے کہ سیکرٹری روبیو،نائب صدر وینس اور سرکردہ رہنما ممکنہ تباہی کو روکنےمیں شامل تھے۔
ترجمان امریکی محکمہ کاکہنا تھا کہ دونوں ممالک کے ساتھ ہمارے تعلقات برقرار اور اچھے ہیں۔ہمارے سفارتکار دونوں ممالک کے لیے پرعزم ہیں۔
خطے اور دنیا کے لیے امریکا کا ان دونوں ممالک کےساتھ کام کرنااچھی خبر ہے یہ ایک ایسے مستقبل کو فروغ دے گا جو فائدہ مند ہو۔
واضح رہے کہ امریکی صدر ٹرمپ نے آج بھارت پر مزید 25 فیصد ٹیرف عائد کیا ہے جس کے بعد اب بھارت پر مجموعی امریکی ٹیرف 50 فیصد ہوگیا ہے۔
