امریکی ٹیکنالوجی کمپنی مائیکروسافٹ نے الزام عائد کیا ہے کہ روس کی مرکزی انٹیلی جنس ایجنسی ایف ایس بی ماسکو میں قائم غیر ملکی سفارتخانوں اور دیگر سفارتی اداروں کے خلاف مال ویئر کے ذریعے جاسوسی کی مہم چلا رہی ہے۔
مائیکروسافٹ کی تھریٹ انٹیلی جنس ٹیم نے اپنی تازہ بلاگ پوسٹ میں بتایا ہے کہ یہ مہم کم از کم 2024 سے جاری ہے اور خاص طور پر ان اداروں کو نشانہ بناتی ہے جو مقامی انٹرنیٹ سروس فراہم کنندگان پر انحصار کرتے ہیں۔ ایف ایس بی متاثرہ کمپیوٹرز پر کسٹم بیک ڈورز انسٹال کرتی ہے، جن کی مدد سے مزید مال ویئر داخل کیا جا سکتا ہے اور اہم ڈیٹا چوری کیا جا سکتا ہے۔
یہ مہم ماسکو میں غیر ملکی سفارتخانوں، سفارتی مشنز اور حساس اداروں کو نشانہ بنا رہی ہے، خاص طور پر ان اہلکاروں کو جو روس میں مقامی انٹرنیٹ یا ٹیلی کمیونیکیشن خدمات استعمال کرتے ہیں۔ مائیکروسافٹ کے مطابق یہ پہلا موقع ہے کہ ایف ایس بی کی ISP سطح پر جاسوسی کی تصدیق کی گئی ہے۔ فروری 2025 میں ہونے والے ایک مبینہ سائبر حملے کا حوالہ دیا گیا ہے جس میں غیر ملکی سفارتخانوں کو نشانہ بنایا گیا، تاہم متاثرہ ممالک کا نام ظاہر نہیں کیا گیا۔
روس کی جانب سے فوری طور پر اس الزام کی تردید کی گئی ہے، اور ماضی میں ماسکو نے ایسے تمام الزامات کو رد کیا ہے۔
یاد رہے کہ امریکا اور نیٹو ممالک یوکرین کی جنگ کے تناظر میں روس پر دباؤ ڈال رہے ہیں اور اپنی دفاعی صلاحیتوں کو بڑھانے کے عزم کا اظہار کر چکے ہیں۔
مائیکروسافٹ نے اس مہم کو "Secret Blizzard" کا نام دیا ہے، جبکہ دیگر سائبر سیکیورٹی ادارے اسے "Turla" کے نام سے جانتے ہیں۔ یہ روسی یونٹ تقریباً دو دہائیوں سے مختلف حکومتوں، صحافیوں اور اداروں کے خلاف ہیکنگ مہمات میں ملوث رہا ہے۔
