واٹس ایپ نے صارفین کے لیے متعدد نئے فیچرز متعارف کرانے کا اعلان کیا ہے۔ میٹا کی ملکیت والے اس میسجنگ پلیٹ فارم نے اپنی بلاگ پوسٹ میں ان نئے فیچرز کی تفصیل دی۔
ان میں سب سے نمایاں نیا مسڈ کال میسجز فیچر ہے، جو روایتی وائس میل کا متبادل فراہم کرے گا۔
اس کا مقصد دوستوں اور رشتہ داروں سے رابطے کو مزید آسان بنانا ہے۔ اس فیچر کے ذریعے صارفین اس وقت نوٹ ریکارڈ کر سکیں گے جب ان کے دوست یا رابطہ کال وصول کرنے کے لیے دستیاب نہ ہوں۔
کال کی نوعیت کے مطابق، صارف وائس یا ویڈیو نوٹ ریکارڈ کرکے بھیج سکتے ہیں۔ کمپنی کے مطابق، یہ فیچر وائس میلز کو ماضی کی بات بنا دے گا۔
مزید برآں، صارفین اب کسی وائس چیٹ کے دوران نئے ری ایکشنز کے ذریعے فوری ردعمل دے سکیں گے، جس سے چیٹ متاثر نہیں ہوگی۔
واٹس ایپ نے وائس کالز میں اسپیکر فیچر کے حوالے سے بھی اپڈیٹس جاری کی ہیں۔
اس کے علاوہ، کمپنی نے میٹا اے آئی کے ذریعے تصاویر تیار کرنے کے عمل کو بہتر بنانے کا بھی اعلان کیا ہے۔
اب میٹا اے آئی نئے امیج جنریشن ماڈل کی خصوصیات سے لیس ہوگا۔
کمپنی نے دعویٰ کیا ہے کہ اب تصاویر کی تیاری کا عمل بہت زیادہ بہتر محسوس ہوگا۔
میٹا اے آئی میں تصاویر کو انیمیٹ یا متحرک کرنے کی صلاحیت کا اضافہ بھی کیا جا رہا ہے۔
صارفین کسی بھی تصویر کو ایک مختصر ویڈیو میں تبدیل کرسکیں گے جس کا انحصار ان کی تحریری ہدایات اور میسجز پر ہوگا۔
واٹس ایپ ڈیسک ٹاپ ایپ میں ایک نئی میڈیا ٹیب کا اضافہ کیا جا رہا ہے تاکہ ڈاکومنٹس، لنکس اور چیٹس میں موجود میڈیا فائلز کو آسانی سے ڈھونڈنا جاسکے۔
واٹس ایپ میں لنک پریویو کو بھی بہتر بنایا گیا ہے۔
آخری اپ ڈیٹ اسٹیٹس میں نئے اسٹیکرز کا اضافہ ہے۔
صارفین اب میوزک لیرکس، انٹرا ایکٹیو اسٹیکرز اور سوالات اسٹیٹس میں ایڈ کرسکیں گے جن پر ان کے کانٹیکٹس ردعمل ظاہر کرسکیں گے۔
