دنیا بھر میں روزانہ لاکھوں اسمارٹ فونز فروخت ہوتے ہیں، مگر کونسا فون لوگوں کی توجہ کا سب سے زیادہ مرکز بنتا ہے؟
2025 کے اولین 9 ماہ کے دوران دنیا بھر میں سب سے زیادہ فروخت ہونے والا اسمارٹ فون کسی اینڈرائیڈ ڈیوائس بنانے والی کمپنی کا نہیں بلکہ ایپل کا آئی فون 16 ہے۔
کاؤنٹر پوائنٹ ریسرچ کی رپورٹ کے مطابق جولائی سے ستمبر 2025 کے دوران دنیا بھر میں ایپل کے آئی فون 16 کا غلبہ رہا۔
درحقیقت جنوری سے ستمبر کے دوران دنیا بھر میں آئی فون 16 ہی سب سے زیادہ فروخت ہونے والا اسمارٹ فون رہا ہے۔
پہلے جنوری سے مارچ پھر اپریل سے جون 2025 کے دوران اسی فون کو سب سے زیادہ فروخت ہونے والا ماڈل قرار دیا گیا تھا۔
اس طرح یہ 9 ماہ کے دوران سب سے زیادہ فروخت ہونے والا فون بن گیا ہے۔
جولائی سے ستمبر کے دوران سب سے فروخت ہونے والے فونز میں دوسرا نمبر آئی فون 16 پرو کے حصے میں آیا جبکہ آئی فون 16 پرو میکس تیسرے نمبر پر رہا۔
فروری 2025 میں متعارف کرائے جانے والا آئی فون 16 ای سب سے زیادہ فروخت ہونے والے فونز کی اس فہرست میں چوتھے نمبر پر رہا۔
اس کے بعد 5 سے 9 نمبر تک جنوبی کورین کمپنی سام سنگ کے اے سیریز کے مختلف ماڈلز موجود ہیں۔
ایپل کا آئی فون 17 پرو میکس حیران کن طور پر 10 ویں نمبر پر سب سے زیادہ فروخت ہونے والا فون ثابت ہوا۔
یہ حیران کن اس لیے ہے کیونکہ اس فون کو ستمبر کے دوسرے عشرے کے آخر میں ہی فروخت کے لیے پیش کیا گیا تھا اور محض چند دنوں میں یہ اس فہرست کا حصہ بننے میں کامیاب ہوگیا۔
دلچسپ بات یہ ہے کہ دنیا بھر میں مہنگائی کی شرح میں کافی عرصے سے اضافہ ہو رہا ہے اور لوگوں کی قوت خرید متاثر ہوئی ہے، مگر ایپل کے آئی فونز اب بھی سب سے زیادہ فروخت ہو رہے ہیں۔
2024 میں دنیا بھر میں سب سے زیادہ فروخت ہونے والا فون آئی فون 15 تھا جس کا مارکیٹ شیئر مجموعی طور پر 3 فیصد رہا۔
دوسرے نمبر پر آئی فون 16 پرو میکس رہا جو ستمبر 2024 میں متعارف کرایا گیا تھا۔
آئی فون 15 پرومیکس کے حصے میں تیسرا نمبر آیا۔
