پاکستان کرکٹ بورڈ نے اعلان کیا ہے کہ پاکستان سپر لیگ کی فرنچائز ٹیموں اور دیگر اثاثوں کی ویلیوایشن کا عمل مکمل ہو گیا ہے۔ اب اگلے دس سال کے لیے نئی فیس کے ساتھ فرنچائز معاہدوں کی تجدید کی پیشکش تمام اہل پی ایس ایل فرنچائزز کو بھیج دی گئی ہے۔ ٹیموں سے کہا گیا ہے کہ وہ مقررہ ڈیڈ لائن کے اندر اپنے فیصلے پی ایس ایل مینجمنٹ کو آگاہ کریں۔
فورنچائز کے دس سالہ معاہدوں کی شفافیت کو یقینی بنانے کے لیے، پاکستان کرکٹ بورڈ نے فرنچائز نمائندوں اور چارٹرڈ فرم EY MENA کے درمیان مشترکہ اور انفرادی ملاقاتیں بھی ترتیب دی ہیں۔
ان ملاقاتوں میں فرنچائز مالکان کو موقع دیا جائے گا کہ وہ ویلیوایشن کے طریقہ کار کا جائزہ لیں اور اس حوالے سے اپنے سوالات کریں۔
مزید برآں، پاکستان کرکٹ بورڈ کو چارٹرڈ فرم EY MENA کی جانب سے دو نئی پی ایس ایل فرنچائز ٹیموں کی ممکنہ قیمتوں کے حوالے سے رپورٹس بھی موصول ہو گئی ہیں۔ ان دونوں ٹیموں کی فروخت کے لیے ٹینڈر کا عمل جلد شروع کیا جائے گا۔
نئی فرنچائز خریدنے میں دلچسپی رکھنے والوں کو اپنی ٹیموں کے لیے جن شہروں کے ناموں کی چوائس دی جائے گی ان میں حیدرآباد، سیالکوٹ، مظفرآباد، فیصل آباد، گلگت اور راولپنڈی شامل ہیں۔
پی سی بی کی انتظامیہ نے اس عزم کا اظہار کیا ہے کہ پی ایس ایل کے تمام شراکت داروں کے ساتھ منصفانہ، شفاف اور باہمی مفاد پر مبنی تعلقات برقرار رکھے جائیں گے، کیونکہ یہ لیگ پاکستان کرکٹ کی ترقی اور عالمی سطح پر پہچان میں اہم کردار ادا کر رہی ہے۔
