تین ملکی سیریز اور ایشیا کپ میں اوپنر فخر زمان کے ساتھ فاسٹ بولر سلمان مرزا کی ٹیم میں شامل ہونے کے قوی امکانات ہیں، جبکہ شاداب خان کے نام پر غور نہیں کیا جا رہا۔
ممکنہ کھلاڑیوں کا اعلان اگلے ہفتے متوقع ہے اور کیمپ لاہور میں لگانے کی تجویز دی گئی ہے، تاہم حتمی فیصلہ ویسٹ انڈیز سے واپسی پر سلیکٹرز، ہیڈ کوچ اور کپتان سلمان آغا کی مشاورت سے کیا جائے گا۔
ذرائع کے مطابق ہیمسٹرنگ انجری کا شکار بائیں ہاتھ کے اوپنر فخر زمان ایک یا دو روز میں نیشنل کرکٹ اکیڈمی میں رپورٹ کریں گے جہاں پی سی بی کے میڈیکل پینل ان کی انجری کا جائزہ لے گا۔
اطلاعات کے مطابق فخر زمان کی انجری زیادہ تشویشناک نہیں ہے اور امید کی جا رہی ہے کہ معمول کے ری ہیب کے ذریعے وہ فٹنس کے مسائل سے نجات حاصل کر لیں گے۔
سلیکٹرز کو بھی پورا یقین ہے کہ فخر زمان تین ملکی سیریز اور ایشیا کپ کے لیے دستیاب ہوں گے۔
اس کا انحصار ان کی میڈیکل رپورٹس پر ہے، اگر میڈیکل پینل نے اجازت دی تو پھر فخر زمان کولازمی طورپر اسکواڈ میں شامل کیا جاسکتا ہے۔
بولنگ کے شعبے کو مزید مضبوط بنانے کے لیے سلیکٹرز سلمان مرزا کو اسکواڈ کا حصہ بنانے کے حامی ہیں، اس لیے ان کا نام ڈارون آسٹریلیا جانے والے اسکواڈ سے واپس لیا گیا ہے۔
پی ایس ایل کے بعد بنگلا دیش کے خلاف سیریز میں سلمان مرزا نے متاثر کن پرفارمنس دی ہے۔ تین ملکی ون ڈے سیریز اور ایشیا کپ کے لیے سولہ کھلاڑیوں کا انتخاب کیا جاسکتاہے۔
پاکستان، افغانستان اور یوا اے ای کی سیریز 29 اگست سے شارجہ میں ہوگی جس کی تیاریوں کےلیے تربیتی کیمپ بیس اگست کو متوقع ہے۔
