سوشل میڈیا پر حال ہی میں ایک تصویر وائرل ہوئی جس میں دعویٰ کیا گیا کہ پاکستانی کرکٹر اعظم خان نے صرف دو ماہ میں 69 کلو وزن کم کیا ہے۔
تصویر نے مداحوں کو حیران کر دیا اور سوشل میڈیا پر تعریفی تبصرے سامنے آئے، تاہم کچھ صارفین نے اس دعوے پر شبہ کا اظہار بھی کیا۔
اب خود اعظم خان نے حقیقت واضح کرتے ہوئے افواہوں کو ختم کر دیا ہے۔ انسٹاگرام پر اسی تصویر کو شیئر کرتے ہوئے انہوں نے لکھا، "کام جاری ہے، لیکن یہ تصویر 2020 کی ہے۔
صحت کے ماہرین کے مطابق 69 کلو وزن صرف 8 ہفتوں میں کم کرنا نہ صرف جسمانی طور پر غیر حقیقی ہے بلکہ خطرناک بھی ہو سکتا ہے۔
یاد رہے کہ اعظم خان ماضی میں بھی فٹنس بہتر بنانے کے سفر پر گامزن رہے ہیں۔ 2021ء میں رپورٹس کے مطابق وہ پہلے ہی 30 کلو وزن کم کر چکے تھے تاکہ قومی ٹیم کے معیار پر پورا اتر سکیں۔
ایک انٹرویو میں وہ کہہ چکے ہیں، ’میں اپنی جسمانی ساخت نہیں بدل سکتا، مگر میری پوری توجہ فٹنس قائم رکھنے اور بہتر کارکردگی دکھانے پر ہے‘۔
