عالمی اسنوکر ماسٹرز چیمپئن شپ میں پاکستان کے محمد آصف نے شاندار کارکردگی کا مظاہرہ کرتے ہوئے فائنل میں بھارت کے وجے نجانی کو شکست دے کر ٹائٹل اپنے نام کر لیا۔
بحرین کے دارالحکومت منامہ میں کھیلے گئے سنسنی خیز فائنل میں محمد آصف نے بھارتی کھلاڑی وجے نجانی برجیش دامانی کو 3-4 سے مات دی اور ایک اور عالمی اعزاز پاکستان کے نام کیا۔
منامہ سے موصولہ اطلاعات کے مطابق فائنل میں دونوں کھلاڑیوں کے درمیان اعصاب شکن مقابلہ ہوا، ایک موقع پر مقابلہ2-2 فریمز سے برابر تھا۔
آخری فریم میں پاکستانی کیوئسٹ نے اپنی بالادستی قائم کرکے بھارتی حریف کو شکست سے دوچار کرکے عالمی ماسڑ چیمپیئن ہونے کا اعزاز بھی اپنے نام کرلیا۔
محمد آصف نے سیمی فائنل میں بھارت ہی کے منان چندرا کو 2-4، کوارٹر فائنل میں میزبان کھلاڑی حبیب صباح کو 0-4 اور پری کوارٹر فائنل میں متحدہ عرب امارات کے کیوئسٹ محمد شہاب کو 2-4 سے شکست دی تھی۔
