بھارت نے سیمی فائنل میں نیوزی لینڈ کو شکست دے کر ورلڈ کپ فائنل کیلئے کوالیفائی کرلیا

ممبئی کے وانکھڈے کرکٹ اسٹیڈیم میں کھیلے گئے پہلے سیمی فائنل میں بھارت نے نیوزی لینڈ کو ستر رنز سے شکست دے دی۔ تین سو ستانوے رنز کے جواب میں کیویز 48.5 اوورز میں 327 رنز پر ہمت ہار گئے۔

محمد شامی کیویز کے لیے ڈراؤنا خواب بن گئے۔ سات کھلاڑیوں کو پویلین بھیجا۔ ڈیرل مچل کے ایک سو سینتیس رنز بھی رائیگاں گئے۔ ویرات کوہلی اور شریاس ایئرنے شاندارسنچریاں بنائیں۔

نیوزی لینڈ کی اننگز:

ہدف کے تعاقب میں نیوزی لینڈ کا آغاز مایوس کن رہا۔ دونوں اوپنرز صرف 39 کے مجموعی اسکور پر 13، 13 رنز پر آؤٹ ہوگئے۔ کپتان کین ولیمسن نے ذمہ دارانہ بیٹنگ کرتے ہوئے ٹیم کو سہارا دیا لیکن وہ 69 رنز بناکر آؤٹ ہوگئے۔

کین ولیمسن کے آؤٹ ہونے کے بعد نیوزی لینڈ کی چوتھی وکٹ بھی فوراً گر گئی، ٹام لیتھم صفر، گلین فلپس 41، مارک چپمین 2 رنز پر پویلین لوٹ گئے۔

46 ویں اوور میں ڈیرل مچل 134 رنز کی شاندار اننگز کھیل کر ہمت ہار بیٹھے جس کے بعد وکٹوں کی جھڑی لگ گئی۔

مچل سانٹنر اور ٹم سوتھی 9، 9 اور لوکی فرگوسن 6 رنز بناکر آؤٹ ہوگئے۔ ٹرینٹ بولٹ دو رنز کے ساتھ ناٹ آؤٹ رہے۔ بھارت کی طرف سے محمد شامی نے 7، جسپریت بمراہ، محمد سراج اور کلدیپ یادیو نے ایک، ایک وکٹ حاصل کی۔

بھارت کی اننگز:

بھارت نے ٹاس جیت کر پہلے بیتنگ کرتے ہوئے مقررہ 50 اوورز میں 4 وکٹوں کے نقصان پر 397 رنز بنائے۔ بھارت کی جانب سے ورات کوہلی 117 اور شریاس ایر 105 رنز بنا کر نمایاں رہے۔

ورات کوہلی نے کیرئیر کی 50ویں ون ڈے سینچری اسکور کرتے ہوئے سب سے زیادہ سینچریوں کا اعزاز بھی اپنے نام کرلیا۔ اس سے قبل سچن ٹنڈولکر 49 سینچریوں کے ہمراہ پہلے نمبر پر براجمان تھے۔

بھارتی کپتان روہت شرما نے دھواں دار 47 رنز بنا کر آؤٹ ہوئے۔ کریمپ پڑنے کے سبب 23 ویں اوور میں باہر جانے والے شبمن گل سوریا کمار یادو کے آؤٹ ہونے کے بعد دوبارہ میدان میں آئے اور صرف ایک رن کے اضافے کے ساتھ 80 رنز ناٹ آؤٹ پویلین لوٹے جبکہ کے ایل راہول 39 رنز بنا کر ناقابلِ شکست رہے۔

نیوزی لینڈ کی جانب سے ٹِم ساؤتھی نے 3 اور ٹرینٹ بولٹ نے 1 وکٹ حاصل کی۔

قبل ازیں بھارتی ٹیم کے کپتان روہت شرما نے ٹاس جیت کر پہلے بیٹنگ کرنے کا فیصلہ کرلیا، انہوں نے کہا کہ کوشش کریں گے کیویز کیخلاف بڑا اسکور کرکے پریشر بڑھائیں۔

اس موقع پر نیوزی لینڈ کے کپتان کین ولیمسن نے کہا کہ ٹاس جیت کر پہلے بیٹنگ کا ہی فیصلہ کرتے تاہم کوشش کریں گے ابتدائی اوورز میں جلد وکٹیں لیکر میزبان ٹیم کو پریشر میں لائیں۔

دونوں ٹیموں کی جانب سے پلئینگ الیون میں کوئی تبدیلی نہیں کی گئی ہے۔

بھارت کا اسکواڈ

کپتان روہت شرما، شبمن گل، ویرات کوہلی، شریاس ایر، کے ایل راہول، رویندرا جڈیجا، شاردول ٹھاکر، جسپریت بمراہ، کلدیپ یادیو اور محمد سراج

نیوزی لینڈ کا اسکواڈ

کپتان کین ولیمسن، ڈیون کونوے، راچن رویندرا، ڈیرل مچل، ٹام لیتھم، گلین فلپس، مارک چیپمین، مچل سینٹنر، لوکی فرگوسن، ٹم ساؤتھی، ٹرینٹ بولٹ