اسلام آباد ہائیکورٹ نے جعلی اکاؤنٹس کیس میں سابق وزیر اعلیٰ سندھ سید قائم علی شاہ کی عبوری ضمانت میں آٹھ مئی تک توسیع کر دی۔
تفصیلات کے مطابق اسلام آباد ہائی کورٹ میں جسٹس عامرفاروق اور جسٹس محسن اختر کیانی نے سابق وزیر اعلیٰ سندھ سید قائم علی شاہ کی عبوری ضمانت میں توسیع کی درخواست پر سماعت کی ۔
قائم علی شاہ اور انکے وکیل فاروق ایچ نائیک عدالت کے روبرو پیش ہوئے ۔
نیب پراسیکیوٹر نے کہاکہ پیراوائز کمنٹس عدالت میں جمع کرادیئے ، جس پر فاروق ایچ نائیک کا کہنا تھا پیراوائز کمنٹس کی کاپی ہمیں نہیں ملی، وکیل صفائی فاروق ایچ نائک کی جانب سے مزید دس دن کیلئے ضمانت میں توسیع کی استدعا کی گئی۔
جس پر جسٹس عامر فاروق نے کہاکہ تمام جعلی اکاونٹس کیسز کو 15 مئی کیلئے مقرر نہیں کرسکتے،تمام کیسز کو الگ الگ لے کر چلنا ہے۔
فارو ق ایچ نائیک کا کہنا تھا سوموار کو عمرے پر جا رہا ہوں آگے کی تاریخ دے دیں، جس پر جسٹس عمر فاروق نے کہاکہ تو آپ جمعرات کو پیش ہو جائیں۔
فاروق ایچ نائیک نے کہاکہ استدعا ہے 6 کے بجائے 8 مئی کی تاریخ رکھ لیں، جس پر عدالت نے وکیل صفائی فاروق ایچ نائیک کی استدعا منظور کرتے ہوئے 8 مئی تک توسیع دے دی۔
خیال رہے سابق وزیر اعلیٰ سندھ قائم علی شاہ کی ٹھٹھہ اور دادو شوگر ملز کیس میں ضمانت آج ختم ہورہی تھی۔
یاد رہے جعلی اکاؤنٹس کیس میں وزیراعلیٰ سندھ مراد علی شاہ بیان ریکارڈ کرانے نیب ہیڈکوارٹرز پہنچےتھے تو نیب کی 6رکنی ٹیم وزیراعلیٰ سندھ سے ٹھٹھہ، دادو شوگرملز کیس میں پوچھ گچھ کی تھی۔
بعد ازاں سابق وزیر اعلی قائم علی شاہ نے ضمانت قبل از گرفتاری کے لئے اسلام آباد ہائی کورٹ میں درخواست دائر کی تھی ، درخواست مؤقف اختیار کیا گیا تھا کہ درخواست گزار کا منی لانڈرنگ سے کوئی لینا دینا نہیں سیاسی بنیادوں پر نام شامل کیا گیا اور استدعا کی جب تک کیس کی سماعت مکمل نہیں ہوجاتی قائم علی شاہ کو گرفتار نہ کیا جائے۔
