سندھ بھر میں 8 سے 10 محرم تک ڈبل سواری پر پابندی عائد

محکمہ داخلہ کی جانب سے جاری نوٹی فکیشن کے مطابق سندھ بھر میں امن عامہ کی صورتحال کو برقرار رکھنے کیلئے یکم تا 10 محرم تک کرمنل پراسیجر کوڈ کے تحت دفعہ 144 نافذ رہے گی۔

تاہم کرمنل پروسیجر کوڈ (سی پی سی) کی دفعہ 144 (6) کے تحت 8 سے 10 محرم تک صوبے بھر میں موٹر سائیکل کی ڈبل سواری پر پابندی ہو گی۔البتہ اس پابندی کا اطلاق خواتین، 12 سال سے کم عمر بچوں، بزرگوں، صحافیوں، قانون نافذ کرنے والے اداروں کے اہلکاروں، ڈاکٹروں، فائر فائٹرز اور ریسکیو سروسز کے ملازمین پر نہیں ہوگا۔

دفعہ 144 کے نفاذ کے بعد صوبے بھر میں اسلحے کی نمائش، لاؤڈ اسپیکر کے غلط استعمال، دیواروں پر چاکنگ کے ساتھ ساتھ اشتعال انگیز تقریریں کرنے یا انہیں نشر کرنے پر بھی پابندی ہوگی۔