سندھ میں شعبہ صحت کو تیزی سے جدید تقاضوں سے ہم آہنگ کیا جا رہا ہے، اور اب محکمہ صحت سندھ نے ایک اور سنگ میل عبور کر لیا ہے۔
سندھ انٹیگریٹڈ ایمرجنسی ہیلتھ سروسز ڈیپارٹمنٹ نے صوبے کی پہلی ریورائن بوٹ ایمبولینس سروس (کشتی ایمبولینس سروس) متعارف کرا دی ہے۔ یہ کشتی ایمبولینس سیلاب، قدرتی آفات اور دشوار گزار آبی علاقوں میں قیمتی انسانی جانیں بچانے اور جدید ایمرجنسی سہولیات کی فراہمی یقینی بنائے گی،یہ سروس خاص طور پر اُن علاقوں کے لیے تیار کی گئی ہے جہاں زمینی راستوں کی رسائی محدود یا ناممکن ہے۔
اس بوٹ ایمبولینس میں جدید طبی آلات، وائرلیس کمیونی کیشن سسٹم، موجود ہے، ابتدائی مرحلے میں آزمائشی بنیادوں پر چار کشتیاں چلائی جا رہی ہیں، جب کہ منصوبے کے اگلے مرحلے میں کشتیوں کی تعداد بڑھا کر 26 تک لے جانے کا ہدف رکھا گیا ہے۔
یہ ماڈل حال ہی میں منعقد ہونے والی میری ٹائم ایکسپو میں بھی پیش کیا گیا، جہاں اسے ملکی اور غیر ملکی وفود کی جانب سے بھرپور پذیرائی ملی۔ سندھ انٹیگریٹڈ ایمرجنسی ہیلتھ سروسز ڈیپارٹمنٹ کے سی ای او بریگیڈیئر (ریٹائرڈ) طارق قادر لکھیار بنے باخبر سویرا کے مہمان اور انہوں نے بتایا کہ یہ ان لوگوں کے لیے ہے، جو پانی کے اطراف رہتے ہیں اور اپنے گھر چھوڑنا نہیں چاہتے۔ ایسے افراد کو طبی ضرورت کے وقت ابتدائی طبی سہولت فراہم اور اسپتال منتقل کیا جائے گا۔ انہوں نے بتایا کہ اس ایمبولینس کا ٹرائل کراچی، ٹھٹھہ اور سجاول کے سمندری علاقوں سمیت کینجھر جھیل میں کیا جا چکا ہے جب کہ منچھر جھیل سمیت لاڑکانہ، سکھر اور کشمور میں اس کا ٹرائل جاری ہے۔
