پنجاب کے دریاؤں میں سیلابی کیفیت برقرار ہے اور مزید لاکھوں افراد کو محفوظ مقامات پر منتقل کیا جا چکا ہے، تاہم بعض مقامات پر پانی کے بہاؤ میں کمی بھی دیکھی گئی ہے۔
دریائے چناب میں ہیڈ تریموں پر بہت اونچے درجے کا سیلاب برقرار ہے اور پانی کا بہاؤ 5 لاکھ 41 ہزار کیوسک تک پہنچ گیا، جبکہ ہیڈ مرالہ پر پانی کی آمد کم ہو کر 96 ہزار کیوسک پر آ گئی ہے۔
ڈی جی پروونشل ڈیزاسٹر مینجمنٹ اتھارٹی (پی ڈی ایم اے) پنجاب عرفان کاٹھیا کے مطابق، چناب کا پانی ہیڈ تریموں سے ملتان کے ہیڈ محمد والا کی طرف جا رہا ہے۔
ملتان کی حدود سے آج 8 لاکھ کیوسک پانی گزرنے کا امکان ہے، اور ہیڈ سدھنائی کو بچانے کے لیے کسی بھی وقت مائی صفوراں بند توڑا جا سکتا ہے۔
کمشنر ملتان کے مطابق، 4 لاکھ سے زائد افراد کو محفوظ مقامات پر منتقل کیا جا چکا ہے، جبکہ مظفر گڑھ بھی سیلاب کی زد میں ہے، جہاں رنگ پور کی 14 بستیاں پانی میں ڈوب گئی ہیں۔
دریائے چناب کے قریب بسنے والے مکین بھی سیلاب سے پریشان ہیں اور انہوں نے شکایت کی ہے کہ اب تک حکومتی اہلکاروں نے ان سے رابطہ نہیں کیا۔
ملتان کے ریلیف کیمپس میں وبائی امراض کی اطلاعات بھی موصول ہوئی ہیں، جہاں چھوٹے بچے مختلف بیماریوں کا شکار ہو رہے ہیں۔ انتظامیہ کا کہنا ہے کہ متاثرین کو امدادی سامان فراہم کیا جا رہا ہے۔
ادھر دریائے راوی میں ہیڈ سدھنائی پر بھی بہت اونچے درجے کا سیلاب ہے، جہاں بہاؤ ایک لاکھ 5 ہزار کیوسک کے قریب پہنچ گیا۔
ہیڈ بلوکی پر پانی کے بہاؤ میں کمی ہوئی ہے اور اب یہ ایک لاکھ 48 ہزار کیوسک پر ہے، تاہم سیلاب اب بھی بہت اونچے درجے پر برقرار ہے۔
فلڈ فورکاسٹنگ ڈویژن لاہور کے مطابق دریائےستلج میں گنڈاسنگھ والا کے مقام سے ڈیٹا موصول نہیں ہو سکا تاہم ہیڈ سلیمانکی پر اونچے درجے کا سیلاب ہے جہاں بہاؤ ایک لاکھ 24 ہزار کیوسک رکارڈ کیاگیا۔
ہیڈ اسلام پر درمیانے درجے کا سیلاب ہے جبکہ دریائے سندھ میں بھی گڈو ،سکھر اور کوٹری پر نچلے درجےکے سیلاب بر قرار ہیں۔
