اسپیکر پنجاب اسمبلی ملک محمد احمد خان نے کہا ہے کہ اگر وزیراعظم کو غلط بیانی پر نااہل کیا جا سکتا ہے تو ایوان کو تماشہ بنانے والے ارکان کے خلاف کارروائی کیوں نہیں ہو سکتی۔ لاہور میں پریس کانفرنس کے دوران انہوں نے بتایا کہ بعض ارکان اسمبلی کو معطل کیا گیا جبکہ کچھ کو نوٹسز جاری کیے گئے۔
اپوزیشن لیڈر نے یہ سوال اٹھایا کہ کیا اسپیکر ریفرنس بھیج سکتا ہے یا نہیں، جبکہ میری رولنگ کے خلاف بہت کچھ کہا اور لکھا گیا۔
ملک احمد خان نے مزید کہا کہ بجٹ سیشن کے دوران کاپیاں پھاڑی گئیں، شور شرابہ کیا گیا اور وزیر خزانہ پر حملے کی کوشش بھی کی گئی۔
انہوں نے زور دیا کہ ایوان میں احتجاج کی بھی کچھ حدود ہونی چاہئیں۔ “میں اس بات کو تسلیم نہیں کرتا کہ قائدِ ایوان یا قائدِ حزب اختلاف کو تقریر کرنے نہ دی جائے، میرا مقدمہ پنجاب کے 12 کروڑ عوام کے حق کا ہے،” انہوں نے کہا۔
اسپیکر کاکہنا تھاکہ مجھ سے کئی ارکان نے کہا کہ 62،63 کے مطابق فیصلہ کریں مگر میں دفعہ 62،63 کے خلاف ہوں، آرٹیکل 62،63 آمریت کی نشانی اور اسے جمہوریت کے خلاف استعمال کیا گیا، میں اپنے آئینی اختیارات سے ایک انچ بھی آگے نہیں بڑھوں گا ، دوسری صورت یہ تھی کہ آرٹیکل 148 کے تحت فیصلہ کیا جائے۔
انہوں نے مزید کہا کہ آرٹیکل 62،63 میں نوازشریف کی نااہلی پر پی ٹی آئی نے اسپیکر اختیار کی حمایت کی تھی، جسٹس آصف سعید کھوسہ نے اسپیکر کو یہ اختیار دیا کہ وہ نشست کو خالی قرار دے، اگر وزیراعظم کو غلط بیانی پر نااہل کیا جاسکتا ہے تو ایوان کو تماشا بنانے والوں کو کیوں نہیں؟ کیا ان لوگوں کا دماغ کام کر رہا ہے جو میرے ریفرنس پر اعتراض اٹھا رہے ہیں؟
ملک احمد کا کہنا تھا کہ پارلیمانی پارٹی بیٹھ کر بات نہیں کرے گی تو 63 ٹو کا فیصلہ سامنے آجائے گا، اپوزیشن کے خلاف ریفرنس کا فیصلہ کرنے میں ابھی26 سے 27 دن باقی ہیں، 26 ارکان کی معطلی کے احکامات حکومتی ارکان کی درخواست پر کیے ہیں۔
اسپیکر نے کہا کہ پی ٹی آئی کی ساری جمہوریت (ن) لیگ کے خلاف ہے، مجھے اپنے حقوق کی پاسداری کے لیے ممبران نے 63 ٹو کے لیے درخواستیں دیں، میں کسی کے خلاف نہیں اسمبلی کی حرمت کی حفاظت کررہا ہوں، میں سیاسی آدمی ہوں اور میری بنیاد کسی کی نااہلی پر نہیں کھڑی ہے۔
