شیخ رشید جی ایچ کیو حملہ سمیت 10 مقدمات میں نامزد ہیں، پنجاب حکومت نے فہرست عدالت میں جمع کروادی۔ انسداد دہشت گردی کی خصوصی عدالت کے جج ملک اعجاز آصف سابق وزیر داخلہ کی 10 مقدمات میں عبوری ضمانتوں کی درخواست پر کل 9 دسمبر کو سماعت کریں گے۔
عوامی مسلم لیگ کے سربراہ اور سابق وزیر داخلہ شیخ رشید کے خلاف مقدمات کی فہرست لاہور ہائی کورٹ کے راولپنڈی بینچ میں جمع کروا دی گئی، جس کے مطابق شیخ رشید جی ایچ کیو حملہ کیس، حساس ادارے کے دفتر پر حملہ، پتھراؤ، جلاؤ گھیراؤ کیس، آرمی میوزیم پر حملہ کیس، رحمان آباد میٹرو بس اسٹیشن جلانے کے مقدمے سمیت 10 کیسز میں نامزد ہیں۔
لاہور ہائی کورٹ راولپنڈی بینچ میں سماعت کے دوران پنجاب حکومت نے شیخ رشید سے متعلق 10 مقدمات کی رپورٹ جسٹس چوہدری عبدالعزیز کے روبرو جمع کروادی۔ جج نے ریمارکس دیے کہ عدالت مقدمات کی تفتیش میں کسی قسم کی مداخلت نہیں کرے گی۔
عدالت نے شیخ رشید کے وکیل سے استفسار کیا کہ کیا آپ چاہتے ہیں عدالت مقدمات کی تفتیش بھی کرے؟، جس پر وکیل سردار عبدالرزاق خان نے جواب دیا کہ مقدمات کی جو رپورٹ پیش کی گئی ہے، عدالت اس کی جانچ پڑتال کرے۔ شیخ رشید کو 6 ماہ بعد 9 مئی کے مقدمات میں کیسے نامزد کیا گیا؟۔
عدالت نے کہا کہ شیخ رشید کے 10 مقدمات کی تفصیل آگئی ہے، جس کی کاپی آپ کو فراہم کردی گئی ہے۔ بعد ازاں مزید سماعت ایک ہفتے کے لیے ملتوی کردی گئی۔
دریں اثنا شیخ رشید نے میڈیا سے گفتگو کرتے ہوئے کہا کہ اگست 2023ء میں پنجاب حکومت نے بتایا تھا کہ میرے خلاف کوئی کیس نہیں۔آج میرے خلاف عدالت میں 10 مقدمات کی تفصیل جمع کرائی گئی۔ انہوں نے کہا کہ میری چھوٹی سی سیاست ہے حلقہ 56 اور 57 کی۔ بچپن سے یہ سوچ ہے سب کو ساتھ لے کر چلتا ہوں۔ اداروں کا احترام سب پر لازم ہے۔
شیخ رشید نے کہا کہ ہم نے پنڈی کے دونوں حلقوں میں کام کیا ہے۔ چلے کے بعد کوئی ٹوئٹ بھی نہیں کی۔ الیکشن نہیں ہوئے تو پرانی تنخواہ پر ہی کام کریں گے۔ ہمیں الیکشن کمیشن کے بیان پر یقین کرنا چاہیے۔ انہوں نے کہا ہے کہ الیکشن 8 فروری کو ہوں گے۔
