باچا خان ایئرپورٹ پشاور پر غیر ملکی ایئرلائن کی پرواز بڑے حادثے سے بال بال بچ گئی، لینڈنگ سے قبل طیارے سے پرندہ ٹکرانے کے باعث طیارے کے انجن کو نقصان پہنچا۔
کراچی سے پشاور پہنچنے والی نجی ائیر لائن سیرین ایئرکی پرواز خوفناک حادثے سے بال بال بچ گئی۔
نجی ایئر لائن کی پرواز ای آر 550 سے پشاور ایئر پورٹ پر لینڈنگ سے پہلے ایک پرندہ طیارے سے ٹکرا گیا۔
پرندہ ٹکرانے کی وجہ سے طیارے کے دائیں انجن کو نقصان پہنچا طیارہ لڑکھڑانے کے باوجود کپتان نے کمال مہارت سے طیارے کو بحفاظت زمین پپر اتار لیا۔
پرندہ ٹکرانے کی وجہ سے ہونے والے نقصان کے بعد طیارے کو گراؤنڈ کردیا گیا ہے جس کے باعث پشاور سے کراچی جانے والی نجی ائیر لائن سیرین ایئر کی پرواز ای آر 551 وقتی طور پر منسوخ کردی گئی، اس حوالے سے ایئرلائن ترجمان کا کہنا ہے کہ طیارہ ٹھیک ہوتے ہی اسے کراچی کے لیے روانہ کردیا جائے گا۔
سول ایوی ایشن (سی اے اے) انتظامیہ کی جانب سے ضلعی انتظامیہ کو متعدد بار پشاور ایئرپورٹ کے اطراف گندگی سے آگاہ کیا گیا لیکن اس شکایت ک اازالہ نہ کیا جا سکا۔
ضلعی انتظامیہ کی جانب سے کچرا نہ اٹھانے کے باعث پشاور ایئرپورٹ پر طیاروں سے پرندہ ٹکرانے کے اب تک 6 سے زائد واقعات رونما ہوچکے ہیں۔
یاد رہے کہ اگر جہاز سے پرندہ ٹکرا جائے تو یہ بات کوئی معمولی نہیں ہوتی بلکہ بڑے حادثے کا سبب بنتی ہے، دنیا بھر کے ایئر پورٹس کی سول ایو ایشن انتظامیہ رن وے سے پرندوں کو دور رکھنے کے لیے برڈ شوٹر تعینات بھی کرتی ہے تاکہ جہازوں کو حادثات سے محفوظ رکھا جاسکے۔
