شمالی وزیرستان میں پاک–افغان سرحد کے قریب سیکیورٹی فورسز نے خفیہ اطلاع پر کارروائی کرتے ہوئے دو خوارج کو ہلاک کر دیا۔ سیکیورٹی ذرائع کے مطابق کارروائی انٹیلی جنس معلومات کی بنیاد پر کی گئی، جس دوران فائرنگ کے تبادلے میں دو خوارج مارے گئے۔ ہلاک ہونے والوں میں سے ایک کا تعلق افغان طالبان سے بتایا جاتا ہے۔
ذرائع کے مطابق آپریشن کے دوران مزید دو خوارج کے مارے جانے اور چار سے پانچ کے زخمی ہونے کی اطلاعات بھی موصول ہوئی ہیں۔ سیکیورٹی فورسز نے علاقے میں سرچ اور سینیٹائزیشن آپریشن شروع کر رکھا ہے۔
دوسری جانب، خیبرپختونخوا کے ضلع ہنگو کے علاقے دوآبہ میں پولیس قافلے پر آئی ای ڈی حملہ کیا گیا، جس کے نتیجے میں ایس ایچ او عمران الدین سمیت تین اہلکار زخمی ہو گئے۔
پولیس کے مطابق حملہ اُس وقت ہوا جب افسران سرچ آپریشن سے واپسی پر تھے۔ زخمی اہلکاروں کو ڈی ایچ کیو اسپتال ہنگو منتقل کر دیا گیا۔
واقعے کے بعد پولیس کی بھاری نفری موقع پر پہنچ گئی، علاقے کو گھیرے میں لے کر سرچ آپریشن شروع کر دیا گیا، جبکہ ضلعی سطح پر سیکیورٹی ہائی الرٹ کر دی گئی ہے۔
واضح رہے کہ خیبرپختونخوا اور بلوچستان میں خاص طور پر دہشت گردی کی سرگرمیوں اس وقت نمایاں طور پر اضافہ دیکھا گیا جب کالعدم تحریک طالبان پاکستان (ٹی ٹی پی) نے نومبر 2022 میں حکومت کے ساتھ ہونے والا جنگ بندی معاہدہ ختم کر دیا تھا۔
معاہدہ ختم کرتے ہوئے کالعدم ٹی ٹی پی نے اعلان کیا تھا کہ وہ سیکورٹی فورسز، پولیس اور دیگر قانون نافذ کرنے والے اداروں پر حملوں میں تیزی لائے گی۔
