مسلم لیگ (ن) کے رہنما احسن اقبال کا کہنا ہےکہ نوازشریف کی سزا انہیں الیکشن سے باہر کرنا اور عمران کی جیت کے لیے راہ ہموار کرنا تھی۔
عدالتی فیصلے کے بعد اسلام آباد ہائیکورٹ کے باہر میڈیا سے گفتگو کرتے ہوئے احسن اقبال نےکہا کہ نیب کا وہ فیصلہ جو انتقام پر مبنی تھا وہ معطل ہوا ہے، یہ ٹرائل اس لحاظ سے بے حد اہم ہے، اس ٹرائل میں اگر پاکستان میں اندھا شخص تھا اسے بھی نظر آگیا ہے ان مقدمات میں آئین ہے اور نہ قانون، اس میں صرف انتقام اور پری پول دھاندلی تھی جس کا مقصد نواز شریف کو انتخابی میدان سے باہر نکال کر عمران خان کی جعلی کامیابی کے لیے راہ ہموار کرنا تھا۔
انہوں نے کہا کہ عدالتی فیصلے پر پاکستان کے عوام اور ملک بھر میں مسلم لیگ (ن) کے کارکنان کو مبارکباد دیتا ہوں، آج اللہ تعالیٰ نے (ن) لیگ کے کارکنان کی دعائیں قبول کی ہیں۔
احسن اقبال کا کہنا تھاکہ یہ نان پی سی او انصاف کی ایک جھلک ہے۔
تمام مقدمات میں نوازشریف، مریم نواز اور صفدر سرخروں ہونگے: خواجہ آصف
اس موقع پر خواجہ آصف نے کہاکہ عدالتی فیصلے پر اللہ تعالیٰ کا جتنا شکر ادا کریں کم ہے، آج انصاف کی فتح ہوئی ہے، نواز شریف کے چاہنے والوں کو مبارکباد دیتے ہیں۔
انہوں نے کہا کہ ان سارے مقدمات میں نوازشریف، مریم نواز اور صفدر سرخروں ہوں گے اور انصاف کا بول بالا ہوگا۔
لیگی رہنما کا کہنا تھا کہ اب جاکر نوازشریف کو جیل سے باہر لائیں گے۔
انصاف ہوتے ہوتے دیر ہوگئی: محمد زبیر
مسلم لیگ (ن) کے رہنما اور سابق گورنر سندھ محمد زبیر نے اپنے رد عمل میں کہا کہ شروع دن سے کہہ رہے ہیں کہ مقدمات میں جان نہیں، انصاف ہوتے ہوتے دیر ہوگئی، سیاسی کیس بنائے گئے۔
محمد زبیر کا کہنا تھا کہ ایک کیس پرپورے خاندان کوٹارگٹ کیا گیا۔
