جنرل قمر باجوہ کی چیف جسٹس سے ملاقات، ڈیمز کی تعمیر کے لیے ایک ارب کا چیک دے دیا

جنرل قمر باجوہ کی چیف جسٹس سے ملاقات، ڈیمز کی تعمیر کے لیے ایک ارب کا چیک دیا فائل فوٹو جنرل قمر باجوہ کی چیف جسٹس سے ملاقات، ڈیمز کی تعمیر کے لیے ایک ارب کا چیک دیا

آرمی چیف جنرل قمر جاوید باجوہ نے چیف جسٹس پاکستان سے ملاقات کرکے ڈیمز کی تعمیر کے لیے فنڈز کا چیک دیا۔

ترجمان سپریم کورٹ کے مطابق آرمی چیف جنرل قمر جاوید باجوہ نے چیف جسٹس پاکستان جسٹس میاں ثاقب نثار سے ملاقات کی جس میں انہوں نے ڈیمز کی تعمیر کے لیے پاک فوج کی جانب سے ایک ارب 59 لاکھ روپے کا چیک دیا۔

آرمی چیف نے چیف جسٹس پاکستان کو خط بھی تحریر کیا جس میں دیامر بھاشا اور مہمند ڈیمز کی تعمیر کے فیصلے کا خیر مقدم کیا گیا۔

آرمی چیف کے خط میں کہا گیا ہےکہ اس قومی مقصد کے لیے پاک فوج کے تمام رینکس نے اپنا حصہ ڈالا ہے، پاک فوج کے افسران بشمول سول افسران نے دو دن کی تنخواہ ڈیمز کے لیے دی جب کہ جونیئرکمیشنڈ افسران اور سپاہیوں نے ڈیمز کے لیے ایک ایک دن کی تنخواہ دی ہے۔

دوسری جانب آئی ایس پی آر نے بھی آرمی چیف کی چیف جسٹس سے ملاقات کی تصدیق کرتے ہوئے بتایا کہ جنرل قمر جاوید باجوہ اور جسٹس ثاقب نثار کے درمیان سپریم کورٹ میں ملاقات ہوئی جس میں آرمی چیف نے پاک فوج کی جانب سے ایک ارب روپے سے زائد کاچیک ڈیم فنڈ کے لیے دیا۔

آئی ایس پی آر کےمطابق آرمی چیف نے کہاکہ پاک فوج قومی ادارے کی حیثیت سے قوم کی تعمیر کے لیے کردار ادا کرتی رہےگی۔

واضح رہےکہ دیامر بھاشا اور مہمند ڈیمز کی تعمیر کے لیے سپریم کورٹ نے فنڈ قائم کیا ہے جس میں وزیراعظم عمران خان نے قوم سے بھی حصہ ڈالنے کی اپیل کی ہے۔

subscribe YT Channel install suchtv android app on google app store