27 اگست سے مون سون بارشوں کے نئے سلسلے کی پیش گوئی کردی گئی تاہم گرم و مرطوب موسم برقرار رہے گا۔
محکمہ موسمیات نے ملک کے مختلف علاقوں میں 27 اگست سے مون سون بارشوں کے نئے اسپیل کی پیشگوئی کردی۔
محکمہ موسمیات نے کہا 27 اگست سے اسلام آباد سمیت مختلف شہروں میں گرج چمک کے ساتھ بارش کا امکان ہے۔
وفاقی دارالحکومت میں آج موسم گرم اور خشک رہنے کی توقع ہے، تاہم مطلع جزوی طور پر ابر آلود رہے گا اور زیادہ سے زیادہ درجہ حرارت تقریباً 35 ڈگری سینٹی گریڈ رہنے کا امکان ہے۔
26 اگست کو اسلام آباد کا درجہ حرارت 36 ڈگری سینٹی گریڈ تک پہنچ سکتا ہے، جبکہ 27 اگست سے شہر میں تیز ہوائیں چلنے کی بھی توقع ہے۔
دوسری جانب کراچی میں گرم اور مرطوب موسم برقرار ہے جبکہ سمندری ہواؤں کی رفتار کم ہوگئی ہے۔
شہر کا درجہ حرارت 33 ڈگری سینٹی گریڈ تک رہنے کا امکان ہے جبکہ جنوب مغربی ہوائیں تقریباً 12 کلومیٹر فی گھنٹہ کی رفتار سے چل رہی ہیں۔
لاہور میں رواں ہفتے بارش کا امکان کم ہے اور گرم و مرطوب موسم برقرار رہنے کی پیشگوئی کی گئی ہے۔
محکمہ موسمیات نے اس سے قبل اسلام آباد، راولپنڈی اور پنجاب کے مختلف شہروں میں شدید بارش کے باعث شہری سیلاب جبکہ پہاڑی علاقوں میں لینڈ سلائیڈنگ کا خدشہ ظاہر کیا تھا۔
محکمہ موسمیات نے شہریوں اور سیاحوں کو بارش کے دوران غیر ضروری سفر سے گریز اور پہاڑی و نشیبی علاقوں میں خصوصی احتیاط کی ہدایت کی ہے۔
ادھر راولپنڈی اور اسلام آباد میں گزشتہ ایک ہفتے سے جاری شدید بارشوں کے باعث شہری معمولات متاثر ہونے پر راولپنڈی میں رین ایمرجنسی نافذ کردی گئی ہے۔
