صدر مملکت آصف علی زرداری اور وزیر اعظم شہباز شریف نے شب معراج کے موقع پر اہم پیغام جاری کردیا۔ ملک بھر میں شب معراج آج عقیدت و احترام کے ساتھ منائی جائے گی جب کہ اس موقع پر مساجد میں خصوصی عبادات، نوافل اور محافلِ ذکر کا اہتمام کیا جائے گا۔ شبِ معراج کے حوالے سے علمائے کرام خصوصی خطابات کریں گے جن میں واقعۂ معراج اور اس کی اہمیت پر روشنی ڈالی جائے گی اور ملک و قوم کی ترقی، سلامتی اور امتِ مسلمہ کے لیے خصوصی دعائیں مانگی جائیں گی۔
شب معراج پر صدر مملکت کا پیغام
صدر مملکت نے کہا کہ الّلہ کے نام سے جو بڑا مہربان نہایت رحم فرمانے والا ہے۔ شبِ معراج کا بابرکت موقع پوری امت مسلمہ کے لیے روحانی بلندی، کامل ایمان اور الّلہ تعالیٰ کے قرب کی عظیم علامت ہے۔
انہوں نے کہا کہ اس مقدس رات میں الّلہ تعالیٰ نے اپنے محبوب نبی حضرت محمد مصطفیٰﷺ کو وہ عظیم الشان اعزاز عطا فرمایا جو انسانی فہم سے بالاتر ہے اور جو اہل ایمان کے لیے سرچشمۂ ہدایت بنا رہے گا۔
ان کا کہنا تھا کہ واقعۂ معراج ہمیں یہ سبق دیتا ہے کہ پختہ ایمان، صبر اور اطاعت کے ذریعے انسان بلند ترین اخلاقی اور روحانی درجات تک پہنچ سکتا ہے۔ یہ ہمیں یہ بھی یاد دلاتا ہے کہ آزمائشیں اور مشکلات عارضی ہوتی ہیں جب کہ الّلہ تعالیٰ کی رحمت اور نصرت ہمیشہ قائم رہتی ہے۔
آصف علی زرداری کہتے ہیں کہ شب معراج کو امت مسلمہ کو نماز کا تحفہ عطا کیا گیا جو خالق اور بندے کے درمیان براہ راست اور مسلسل تعلق قائم کرتی ہے۔
’’نماز محض عبادت نہیں بلکہ یہ نظم و ضبط، کردار سازی اور اجتماعی ذمہ داری کے احساس کا ذریعہ ہے جو ایک منصفانہ اور متوازن معاشرے کی بنیاد فراہم کرتی ہے‘‘۔
اس موقع پر صدر مملکت نے قوم سے اپیل کرتے ہوئے کہا کہ شب معراج کے پیغام کو اپنی روزمرہ زندگی کا حصہ بنائیں تاکہ ہم برداشت، قانون کی بالادستی، سماجی انصاف اور انسانیت کے لیے ہمدردی کو فروغ دے سکیں۔
انہوں نے یہ بھی کہا کہ ہم میں سے ہر ایک کو ایک ایسی ریاست کی تعمیر میں اپنا کردار ادا کرنا ہوگا جہاں امن، صبر اور اخلاقی اقدار ہماری قومی شناخت ہوں۔
صدر مملکت نے اپنے پیغام میں کہا کہ ایک ایسے وقت میں جب دنیا اور بالخصوص امت مسلمہ کو پیچیدہ فکری، سماجی اور انسانی چیلنجز کا سامنا ہے، شب معراج اتحاد، استقامت اور امید کا پیغام دیتی ہے۔ یہ بابرکت رات ہمیں یاد دلاتی ہے کہ مشترکہ چیلنجز سے صرف یکجہتی اور اخلاقی عزم کے ذریعے ہی نمٹا جاسکتا ہے۔
انہوں نے دعا کی ’’میں الّلہ تعالیٰ سے دعا گو ہوں کہ وہ پاکستان کو امن و سلامتی، قومی ہم آہنگی اور پائیدار ترقی عطا فرمائے اور ہمیں ایک مضبوط، باوقار اور فلاحی ریاست کے طور پر آگے بڑھنے کی توفیق دے‘‘۔
آصف علی زرداری کا مزید کہنا تھا کہ الّلہ تعالیٰ ہمیں شبِ معراج کے پیغام کو سمجھنے، اس پر عمل کرنے اور اسے آنے والی نسلوں تک منتقل کرنے کی توفیق عطا فرمائے، آمین۔ پاکستان زندہ باد
وزیراعظم شہبازشریف کا شب معراج پر پیغام
وزیر اعظم نے کہا کہ مسلمانوں کو شب معراج کے بابرکت اور روح پرور موقع پر اظہار تہنیت پیش کرتا ہوں، اللہ تعالی ہمیں روحانی قدر و منزلت سے مستفید ہونے کی سعادت عطا فرمائے۔ شب معراج امت مسلمہ کے لیے عظیم الشان روحانی اور ایمانی اہمیت کی حامل رات ہے۔
انہوں نے کہا کہ اللہ تعالیٰ نے اپنے محبوب حضرت محمدﷺ کو معراج کا شرف عطا فرمایا، یہ رات ہمیں ایمان کی مضبوطی، عبادت کی اہمیت اوراللہ تعالیٰ سے قربت کا درس دیتی ہے جب کہ یہ شب صبر و استقامت، اللہ کی اطاعت اور بلند کردار کی اہمیت کو اجاگر کرتی ہے۔
شہباز شریف کہتے ہیں کہ شبِ معراج ہمیں پیغام دیتی ہے کہ نماز مومن کی معراج ہے، ہمیں چاہیے کہ اپنی انفرادی اور اجتماعی زندگی کو اسلامی تعلیمات کے مطابق ڈھالیں۔
وزیراعظم نے مزید کہا کہ باہمی رواداری، اخوت اور عدل و انصاف کو فروغ دیں جب کہ حق کی راہ میں آزمائشوں اور مشکلات کے بعد اللہ تعالیٰ کی نصرت ضرور پہنچتی ہے۔
